KRALENDIJK – Di 23 te ku 26 di ougùstùs un tim di Fundashon Kitten Rescue Curaçao lo ta presente na Boneiru pa entrená boluntarionan di Klínika di Dòkternan di Bestia Flamingo Island Veterinary Center pa kue pushinan di mondi.

Bou di guia di Jochem Lastdrager e klínika di dòkter di bestia na Boneiru ta desidido pa redusí e populashon di pushinan di mondi riba e isla. A forma un grupo di boluntario pa kue i sterilisá mensualmente pushinan di mondi. Pa esaki sosodé efektivamente nan lo haña entrenamentu serka ekspertonan di Kitten Rescue Curaçao.

Durante e entrenamentu e boluntarionan ta siña kon nan por kue pushinan di mondi na un manera respetuoso pa e animal. Nan ta hasi esaki segun e programa TNR, ku ta para pa ‘Kue, Sterilisá, Buta bèk’ (Trap, Neuter, Return). E wikènt lo no ta konsistí solamente di lès, pero e boluntarionan lo kuminsá den práktika tambe mesora, guiá pa kuedónan di pushi eksperensiá di Kòrsou.

E koperashon entre e klínika di dòkter di bestia na Boneiru i Kitten Rescue Curaçao no ta algu nobo. Resientemente dòkternan di bestia Boneriano a yuda ku sterilisashon di mas ku 100 pushi na Kòrsou. Ku e koperashon nobo aki nan ke yuda e pushinan di mondi riba ámbos isla mihó.