KRALENDIJK – Regata Boneiru 2024 ta primintí di trese e aña aki mas ambiente ku nunka, ku un siman yen di festividat di 6 te 12 di òktober. Banda di e artista- i bandanan ku a anunsiá anteriormente, Tourism Corporation Bonaire (TCB) a revelá un line-up ámplio, ku algun nombernan grandi di tantu mundu musikal lokal komo internashonal.

E sorpresa mas grandi di e anunsionan nobo ta e añadishon di Semii Marten di Boneiru mes. E artista multifasétiko aki, ku ta konosí pa su aktuashonnan energétiko, lo enkantá su públiko ku su meks di hitnan popular manera “Pèrdí” i “Baila ku bo”. Semii ku ta traha den dia komo dj na radio i anochi ta riba podio, ta kombiná su bida drùk ku su estudio i ku esaki e ta keda fiel na su pashon pa músika i baile. 

A añadi Tsean tambe, un di e artistanan mas influyente di Ritmo Kombiná, na e line-up. Nasé na Kòrsou, pero awor aktivo na Hulanda, Tsean ta trese su ‘Playground Tour’ Boneiru. Ku un lista yen di hit manera “Kurashi” i “Seña” e lo forma indudablemente un punto kulminante durante Regata.

DJ Merikano

Tambe e konosido DJ Osocity ku ta konosí mundialmente lo hasi su debut na Boneiru. E DJ Merikano aki, ku tin kasi 3 mion siguidó riba YouTube, a para kaba riba diferente podio internashonal, di Paris te Dubai, i awor lo hiba e pueblo di Boneiru den uforia ku su estilo di músika úniko i su bitnan ku ta kue.

Regata Boneiru 2024 ta primintí di bira un fiesta grandi no riba laman so, pero tambe na tera ku aktuashon di artistanan mundialmente renombrá, ku lo hiba e ambiente riba e isla na un nivel mas haltu. No pèrdè e siman aki yen di músika, kultura i fiesta!

Sigui AWOR.NU pa mas aktualisashon tokante e evento i e programa kompleto.