KRALENDIJK – Hende ku ta stima deporte por disfrutá awe di e saltonan mas bunita i spektakular di Sùrf i BMX. Na Waf di piskadó na Malekon,  vários deportista konosí lo demostrá tur tipo di acrobasia ekstremo. 

Esnan ku ta praktiká sùrf lo mustra salto spektakular riba tow-in, i BMX’ers lo usa un rampa pa demostrá nan abilidat pa asina entretené e públiko.

Maurison Martines, organisadó di e eventu Extreme Summer Dream, ta bisa ku ta spera ku hopi hende lo bini pa e eventu. “Aña pasá e Malekon tabata yen i mi ta kere ku awe lo tin mesun tantu òf asta mas hende.”

Sùrfista di renómbre ta presente

Sùrfers profesonal manera Kiri Thodé, Youp Schmit, Taty i Tonky Frans lo demostrá nan abilidat di tow-in. Pa esaki nan ta ser halé ku un speedboat i un otro boto ta krea un olá na laman pa nan bula ariba. E salto ta duna nan e oportunidat pa demostrá nan abilidat mas ekstremo.

“E ta un actividad tremendo. BMX’ers tambe lo demostrá nan abilidat mañan. Hopi hende tin chèns pa partisipá, inkluyendo mucha chikí. No tin problema si bo no tin un baiskel; nos tin baiskel adishonal disponibel. Na e pir, e BMX’ers lo usa un rampa pa salta den aire i kai na awa. No ta pa gana; e meta ta pa entretene e públiko,” segun Martines.

Reparashon

Den e dianan tras di lomba, a hasi sierto reparashon na e waf di piskadó na Malekon, ku tabata tin buraku basta grandi kousá pa olanan grandi. E organisashon a drecha e waf pa e evento por sigui dal bai awe. Banda di sùrfers i BMX’ers, tambe por partisipá den kompetensianan riba Sup. Inscripción por hasi na lugá.

Double backflip 360

Pero e evento no ta solamente pa plaser. Martines tin un meta. E ke presentá un maniobra nobo na públiko: “Aña pasá mi a hasi un double backflip. Pero e añananan aki mi lo añadi un 360 den e salto. Esaki ta nobo. Nos ta spera pa duna un shou espectakular awe.”

Tur aktividat lo tuma lugá na waf di piskadó na Malekon. E promé actividat lo kuminsá na 12.00 órdu di mèrdia i lo sigui te 19.00 ‘or di anochi. Na Malekon lo tin vários stènt ku komida i bibida.