GRAZIE, ITALIA – Artista Boneriano Ghislaine Monte, konosí komo ‘Ghis Arts’ na Boneiru, a partisipá resientemente den e prestisioso festival internashonal di arte den kaya, Concorso Internazionale dei Madonnari, den Grazie, Italia. E evento aki, ku tabata tuma luga di 13 te 15 di ougùstùs, a marka e di sinkuenta edishon di e festival, kaminda e arte di ‘Madonnari’ a bini na orígen.

“Partisipá den e kompetensia na Grazie ta sinti manera e Olympische Spelen di arte den kaya pa mi. E ta un deporte ku ta eksigí hopi di bo kurpa,” Ghislaine ta konta, ku hopi orguyo pa su logro.

Ghislaine a partisipá den e kategoría ‘Inferno || Semplici’ i a gana di tres premio pa su trabou impreshonante inspirá pa e Minotauro. E festival aki tabata uniko di mas pa motibu di e tema ku tabata skoge: tur artista a haña un frase di Dante su ‘Divina Comedia’ komo su fuente di inspirashon. Ghislaine a haña e frase: “L’infamia di Creti era distesa/che fu Concetta né la falsa vacca” (Ingles: “Creti’s infamy was widespread/ which was conceived in the false cow”), un referensia na e mítiko Minotauro. A pesar di e desafió di hopi awa i pinta den oranan lat di anochi, ela kaba su obra den e tempu di 30 ora ku a keda stipula.

Ku su terser luga, Ghislaine lo subí pa un kategoría mas haltu ‘Qualificati’, kaminda e lo por partisipá otro aña. E kompetensia ta tin mas ku 136 artista di diferente parti di mundu, dividí den tres tema: Paradiso, Purgatorio, i Inferno.

Un siman anterior, Ghislaine a partisipá den e festival internashonal di arte den kaya na Wilhelmshaven, Alemania, ku a tuma luga di 2 te 4 di ougùstùs. Aunke e no a gana un premio na Wilhelmshaven e aña aki, e la krea un trabou bunita inspirá pa kultura i naturalesa di Boneiru, ku ta konta e kuenta di Mamparia Gutu i e piska Gutu. Aña pasá, e la gana promé premio den e kategoría ‘Artista Independiente’ na mesun festival.

Ghislaine ta e úniko artista di e islanan ABC ku ta partisipá den e festivales internashonal di arte den kaya. “Kada aña nan ta puntra mi, ‘Unda Boneiru ta?’ i mi por mustra nan kiko bunita nos isla ta. Esaki ta loke mi ta gusta mas— pues di mira reakshon di hende ora nan mira nos lamannan blou,” e ta bisa ku entusiasmo. “Ku tempu mi ta ripará ku mas i mas hende sa unda Boneiru ta, hopi biaha paso nan a bishitá na bordo di un barku krusero.”

Ghislaine a pinta e artenan aki ku krijt, pues e arte ta disparesé ku e promé yobida di awaseru, loke ta hasi e forma di arte aki uniko. Ghislaine ta hasi esaki ku hopi orguyo i dedíkashon, ku e meta di representá Boneiru i su kultura.