Pa promé biaha e Museo di Resistensia Hulandes Amsterdam ta dediká atenshon den un eksposishon permanente renobá na e eksperensianan di Sürnam i e islanan Hulandes-Karibense durante di Segunda Guera Mundial 

Alkalde Femke Halsema ta habri e eksposishon aki, ku ta titulá E Segunda Guera Mundial i e anterior kolonianan Hulandes, ofisialmente dia 2 di òktober i e ta aksesibel pa públiko for di e siguiente dia.

Despues di e reapertura eksitoso di e Museo di Resistensia na final di 2022, kaminda a presentá e Segunda Guera Mundial mas sútil, e eksposishon nobo ta dirigí  su mes riba e impakto di e guera riba e anterior kolonianan Hulandes.

Independensia

E eksposishon ta suprayá e papel importante di Sürnam i e islanan Hulandes-Karibense manera Aruba, Boneiru, Kòrsou, Saba, Sint Eustatius i Sint Maarten, i nan kontribushon na e esfuersonan di guera. Tambe ta bai diskutí e kambionan sosial, e aktivismo kresiente i e gritu pa independensia den e kolonianan.

Un di e storianan remarkabel ta esun di e aktivista kurasoleño Pedro Medardo de Marchena, ku nan a kue prezo durante guera pasobra tabata konsider’é “peligroso pa e trankilidat i seguridat general”.

Tambe ta dediká atenshon na e presensia militar Merikano na Sürnam i riba e islanan, ku tabata stashoná einan pa protehá e industria vital di materianan prima kontra e atakenan Aleman. E eksposishon ta mustra kon e presensia aki a kontribuí na un sentimentu fortalesé di balor propio i igualdat bou di e habitantenan lokal.

Storianan penetrante 

Ku mas di trinta storia personal e eksposishon ta brinda konosementunan nobo den e eksperensianan di habitantenan di e anterior kolonianan. Un skùter Sürnameo ta konta kon e servisio militar obligatorio durante guera a kontribuí na un sentimentu di igualdat: “Ku e mucha hòmbernan blanku ei mester a hasi mesun kos ku e mucha hòmbernan pretu a duna mas konfiansa propio.” 

Tambe ta enfatisá e papel di Sürnam i e islanan den e industria di guera, manera produkshon di bauxiet na Sürnam i e refinerianan di kombustibel na Aruba i Kòrsou.

Jason Chong, bosero di e Museo di Resistensia Hulandes Amsterdam, ta enfatisá e importansia di e eksposishon aki: “Kontando storianan personal nos ta ofresé diferente perspektiva riba e historia aki. Nos ta duna atenshon na tantu e régimen kruel Hapones komo e resistensia kontra e opreshon kolonial Hulandes di siglonan largu na Indonesia.”

Pero tambe e museo ta mustra e kambionan i e aktivismo na Sürnam i riba e islanan Hulandes-Karibense. “E storianan penetrante aki ta relativamente deskonosí i ta meresé ku ta konta nan.”