KRALENDIJK – Rolando Marin ta selebrá un logro remarkabel: 30 aña di servisio ku hopi dedikashon na Tourism Corporation Bonaire (TCB). Segun TCB for di tempu ku Marin a drenta servisio di TCB dia 1 di sèptèmber 1994, e tabata un empleado konfiabel i ehemplar, ku semper ta para kla pa yuda kaminda ta nesesario. 

Ku en total 39 aña den sektor di turismo, Marin su karera a kuminsá na aña 1985 komo agente di hür outo na Budget Car Rental. Despues, na momentu ku e funshon di Guia Turístiko a bira liber na Ofisina di Turismo, Marin a hasi uso di e oportunidat akí i a pasa over pa TCB pa kontinuá ku su trayekto den promoshon di Boneiru. 

Aktualmente Marin ta trahando komo empleado di informashon, kaminda el a bira e kara di Ofisina di Turismo. E ta disponé di konosementu amplio riba diferente tereno, entre otro historia i flora i founa di Boneiru, di manera ku e ta un atkisishon balioso pa e tim.

Felisitashon

E famia di TCB ta felisitá Marin ku su 30 aña di servisio i ta kla pa atmirá su futuro kontribushonnan na promoshon di nos bunita isla Boneiru.