KRALENDIJK – Regata di Bonaire 2024 lo ta dediká na Henry Toré, un Miembro pa bida di Bonaire Lions Club i un persona importante den e historia di e evento.

E Regata a kuminsá na aña 1968 ku un kompetensia amistoso entre botonan di piska rondó Klein Bonaire. E entusiasmo pa e pustamentu a inspirá e Lions Club, bou di guia di Larry Thielgard, pa organisá e evento di un manera mas strukturá. E evento a krese rápido i na aña 1971 e ofisina di turismo a asumí responsabilidat  di e aktividatnan di dia.

Na aña 1983, ora Henry Toré tabata presidente di e Lions Club, el a introdusí e ‘Festival di Regata’ pa añadí aktividatnan di anochi na e kompetensianan di dia. E festival akí a transformá Kaya Grandi den un feria bibu i  di fiesta, ku musik, presentashonnan i dekorashon, komplementeando e pustamentu riba laman.  Henry Toré no solamente a kontribuí na e kresementu di e Regata, ma tambe na desaroyo kultural i sosial di Boneiru.

Karrera largu

Toré, segun Tourism Corporation Bonaire (TCB) ta bisa, a logra un karrera largu den e tereno di enseñansa i el a tene puestonan importante, manera direktur di Lourdes Mulo i kap di e Departamento di Enseñansa na Boneiru. El a tuma parti den hopi organisashon sosial, inkluí Bonaire Lions Club.