DEN HAAG – Gabinete Schoof ta keda sperá pa mas autosufisensia di e seis Isla Karibeino ku ta forma parti di Reino Hulandes. Esaki por wòrdu dedusí di un komuníkashon di prensa di Ministerio di Asuntu Interno i Relashonnan di Reino, tokante programa di gobierno. 

“E kolaborashon den Reino ta orientá riba mas outosufisensia di e seis islanan. Nos ta parti di un Reino ku kuater pais autónomo ku tin un historia komun largu. Kada país ta responsabel pa prosperidat di nan habitantenan. Den e proseso aki, nan ta usa e forsa di Reino,” segun e komuníkashon di prensa.

Sekretario di Estado Zsolt Szabo, Relashonnan di Reino i Digitalisashon, ta bai un tiki mas leu pa loke ta trata e islanan BES: “Nos ta traha huntu ku e parti Karibense di Reino riba un bon gobersnashon i finansa sólido. Boneiru, Saba i Sint Eustatius mester por ta un parti igual di Hulanda. Pa esaki, nos ta traha pa pone e kondishonnan nesesario na òrdu pa mas desaroyo sosial, ekonómiko i infrastruktural di e islanan.”

Islanan CAS 

Pa loke ta trata di paísnan autónomo Aruba, Kòrsou i Sint Maarten, énfasis di gobièrnu hulandes lo ta dirigí riba bon gobernashon, finansa sólido, seguridat i fortifikason estado di derecho.