KRALENDIJK – Den e tereno duru i piedroso di Boneiru tin un palu spesial ku por resultá esun mas bieu di henter Hulanda. Un wayaká impreshonante, posishoná riba un plato di piedra i difísil pa alkansá, tin un diámetro di tronko di no ménos ku 1.20 meter. Johan van Blerk, doño di Fundashon Tera Barra, ta dediká su mes na preservashon di flora lokal. Un dia despues ku e palu a wordu nominá komo Palu Hulandes di aña 2024, redakshon di Bonaire.nu a papia ku e atmiradó di e palu.

“Esaki ta un fenómeno di berdat,” Van Blerk ta bisa ku entusiasmo. “Den literatura, un wayaká ku un diametro di 80 sèntimeter ya ta kalkulá ku tin mil aña. Esun di nos aki ta muchu mas grandi, ku ta indiká ku e mester tin mas ku mil aña. Probablemente hasta mas bieu.” E palu tin un historia impreshonante. Van Blerk ta splika: “Banda di 500 aña pasá, kolonisadónan a kap e palu pa su uso. E tronko mes tabata muchu grandi pa transportá. Despues di esakí parse ku e palu a spruit atrobe i a sigui krese.”

Loke ta hasi esaki un palu asina spesial no ta solamente su edat, pero tambe su e lugar kaminda e ta keda. “E ta riba un plato di pieda kaminda e tera no ta duna kasi ningun nutriente,” Van Blerk ta konta. “E raísnan mester ta hopi largu pa por yega e awa ku tin den bòm. Ta inkreíbel kon e palu aki a adaptá i a sobreviví.”

E palu ta awor den e spòtlait komo un di esnan nominá pa título di ‘Palu di Aña’. “E nominashon aki ta un oportunidat pa kreá mas konseniensa pa e flora úniko di Boneiru i e importansia di preservashon di naturalesa,” Van Blerk ta suprayá. “Nos ta spera ku hende lo vota i ku e palu lo haña e rekonosimentu ku e meresé.”
Bo tambe kier ku e Wayaka Boneriano wòrdu elegí komo Palu di Aña? Vota aki: https://www.deboomvanhetjaar.nl/stem-op-uw-boom#