KRALENDIJK – Djabièrnè 20 di sèptèmber ta World Clean Up Day – Dia Mundial Di Limpiesa. Aña pasá rònt mundu 198 pais a partisipá na e akshon akí. Un biaha mas Boneiru ke kontribuí na un isla mas limpi. Pa e motibu akí riba djasabra 21 di sèptèmber Boneiru ta organisá un akshon grandi di limpiesa den kuadro di Dia Mundial Di Limpiesa. Den kada bario Selibon ta pone kònteiner grandi, kaminda riba djasabra nos habitantenan gratuitamente por tira / entregá nan shushi. 

Pa motibu ku Boneiru ta tene su Dia Mundial Di Limpiesa riba djasabra 21 di sèptèmber, nos ta pidi atenshon tambe pa International Coastal Clean Up Day – Dia Internashonal Di Limpiesa di Kosta. Esaki ta nifiká ku nos ke dediká atenshon èkstra tambe na limpiesa di nos bichnan i e áreanan a lo largo di nos kostanan. Partisipá komo boluntario! Yuda nos eliminá shushi for di nos bichnan i nos refnan di koral, di manera ku nos ta tene no solamente nos isla, pero nos Parke Nashonal Marino tambe mas limpi. 

Ta importante pa tene nos isla limpi, pa nos mes, pa naturalesa i pa e siguiente generashonnan. Shushi ku ta tirá riba kaya por resultá den naturalesa i okashoná daño na nos bestianan i nos medio ambiente. Plèstik i otro tipo di shushi por keda tras pa hopi aña i shusha nos bichnan i nos refnan di koral. Pa medio di tira shushi den baki di shushi, nos ta yuda prevení ku e ta resultá den naturalesa.

Luna pasá ya kaba sentenáres di boluntario a yuda pa hasi Boneiru limpi ku e lema ‘Boneiru: Limpi i Bunita’, komo preparashon pa Dia di Boneiru. Durante e akshon akí nan a rekohé 28.000 kilo di shushi, for di artíkulo di kas te plèstik i otro tipo di shushi. 

Diputado Cicilia, ku tambe a partisipá na e akshon di limpiesa, ta kontentu ku embolbimentu di nos komunidat: “Ta fantástiko pa mira kuantu hende a partisipá. Pero ta keda preokupante kuantu shushi nos ta topa kuné ainda den nos barionan i den naturalesa. Tin hopi trabou pa hasi ainda pa konsientisá tur habitante i tene Boneiru limpi.”

Tur hende por yuda pa tene Boneiru limpi i bunita. Pues, partisipá na Dia Mundial Di Limpiesa i Dia Internashonal Di Limpiesa Di Kosta! Invitá un amigu, un amiga, bo famia, bo bisindario, bo kolega, bo klup di deporte òf otro hende pa huntu nos hasi Boneiru limpi. Ban tene Boneiru limpi i bunita!