KRALENDIJK – Bonaire International Airport N.V. (BIA) i Tourism Corporation Bonaire (TCB) a ekspresá nan alegria tokante e kantidat di buel ku lo aterisá na Boneiru den temporada di winter.  

Aparte di e buelonan regular ku lo kontinuá, tin vários buelo nobo manera esnan di JetBlue for di Merka, i Corendon di Hulanda. WestJet di Kanada tambe lo bolbe bèk pa un di dos temporada ku buelonan stret entre Toronto i Aeropuerto Flamingo.

“E buelonan nobo i kantidat adishonal di stul a bira realidat den kolaborashon  ku nos sosionan. Mihó konektividat na preis pagabel entre e islanan ta keda un prioridat, i nos ta mira e promé resultadonan di nos esfuersonan. Ku e skema di buelo nobo tin un ret sólido pa komunidat di Boneiru i su bishitantenan,”  direktor di BIA Maarten van der Scheer a bisa.

Mas aksesibel 

Direktòr di TCB, Miles Mercera, tambe ta kontentu ku e desaroyo: “Kolaborashon ku sósionan manera BONHATA, BIA, OLB i TCB a kondusí na realisashon di e skema di buelo pa temporada di winter. Nos ta spera ku esaki lo hasi Boneiru mas aksesibel i pagabel pa tur hende.”