KRALENDIJK – Rotary Club Bonaire (RCB) resien a hasi un kontribushon signifikante na Kas Flamboyan, e hospice renombrá di Bonaire. Durante un reunion resien, Rotary Club Bonaire a entregá un chèk na balor di $4.000 na koordinadó Mimi Dongen i Danny Rojer, presidente di direktiva di Fundashon Hospice Bonaire.

Kas Flamboyan, ku ta selebrá su di shete aniversario e aña aki, ta ofresé kuido esensial na pashèntnan terminal den e último fase di bida. E hospice tin kuater kamber dekorá manera na kas i un espasio komun, kaminda pashèntnan por tuma despedída den un ambiente kaluroso, rondea di famia i amigu.

For di su apertura, Kas Flamboyan a kuidá mas o ménos 130 pashènt, poniendo énfasis riba komfort i dignidat den e delaster fase di bida. Un ekipo dedika di mas o ménos 40 boluntario, di diferente background, ta kla 24 ora pa dia pa ofresé e kuido i sosten nesesario.

E kuido den e hospice ta grátis pa pashèntnan terminal, kaminda Ofisina di Seguro di Kuido (ZJCN) ta kubri un parti signifikante di e gastunan. Sin embargo, pa e parti ku ta resta, Kas Flamboyan ta dependé di donashon. E kontribushon di Rotary Club Bonaire ta enfatisá e importansia sosial di e fasilidatnan aki.

Danny Rojer, presidente di direktiva, ta enfatisá e balor di e hospice: “Nos ekipo dedika di boluntario i koordinadónan no solamente ta ofresé kuido, pero tambe sosten emoshonal. Nan ta guia pashèntnan i famianan durante un proseso komplehó di aseptashon i despedida.”

E donashon di Rotary Club Bonaire lo wòrdu usa pa kontinuá e kuido di kalidat haltu i mehor’é unda ta posibel. Hospice Kas Flamboyan ta invitá personanan interesá pa hasi un bishita i siña mas tokante e ról vital di hospice den komunidat.