KRALENDIJK – Sekretario di Estado Participatie en Integratie (Partisipashon i Integrashon) Jurgen Nobel, lo hasi un bishita di trabou konsekutivamente na Saba, Sint Eustatius i Boneiru di 29 di sèptèmber pa 6 di òktober 2024.

Intenshon di e bishita di Sekretario di Estado Nobel ta pa sera konosí mas mihó ku e islanan i pa papia personalmente tokante e retonan i e bon ehèmpelnan for di den práktika. Durante su bishita, e ta bai den kòmbersashon ku entre otro kolegio ehekutivo di kada isla, partnernan sosial, pero prinsipalmente e habitantenan mes tambe. E Sekretario di Estado ta hasi diferente bishita di trabou relashoná ku e temanan di akohida di mucha, partisipashon, i pobresa. Asina, e lo bishitá diferente sentro di akohida di mucha na e islanan, supermerkado, tayer sosial, i otro organisashon den e dominio sosial. Lo e hiba kòmbersashon ku diferente persona enbolbí tokante pobresa, trabou, i entrada.

Pa mehorá forsa di kompra riba e tres islanan, e gabinete a reservá € 9 mion anualmente pa fortalesé mayornan i esnan ku entrada mínimo i medio, asina a anunsiá resientemente riba Prinsjesdag (Dia di presentashon di Presupuesto na Hulanda). Den e temporada benidero, gabinete lo elaborá medida konkreto. Pa Boneiru, Sint Eustatius i Saba tambe, e gabinete a reservá € 2 mion pa aña, di kua por fortalesé e servisio (insular) riba tereno di pobresa i debe.