KRALENDIJK – Kjelld Masoud Kroon a nase na Hulanda i tin un konekshon estrecho ku Boneiru. E tin un vishon fuerte di e situashon aktual riba e isla i e konteksto mas ámplio di dekolonisashon dentro di Reino Hulandes. Den un entrevista resien el a kompartí su persepshonnan tokante e impakto di e pasado kolonial i e retonan di awendia ku Boneiru ta enfrentá. Tambe ta parse ku Kroon ta preparando su mes pa regresá su isla.

Kroon a nase na Hulanda, pero a krese na Boneiru. Su mayornan tambe a nase riba e isla aki. Kroon a finalisá su skol sekundario 

na Boneiru pa despues bai Hulanda pa studia filosofia. Akinan su énfasis tabata riba filosofia dekolonial i polítiko. Aktualmente e ta traha komo kreadó di programa na Pakhuis de Zwijger na Amsterdam. Akinan e ta traha programanan ku ta trata e tópiko dekolonisashon. Su kompromiso ku diferente movementu hubenil ta ekstendé su mes den henter Reino.

E herensia kolonial 

Segun Kroon Boneiru a someté su mes na un ‘rekolonisashon’ for di 2010.  E ta mustra riba e desigualdat den posishonnan di poder i e outonomia limitá di personanan lokal kompará ku islanan ku ta kai bou di outoridat Ingles, manera Barbados i Bermuda. Segun Kroon tin un problema grandi ta tumando lugá riba e islanan BES. “Pa ta honesto, sí, esei ta korekto. E ta un problema si bo wak e ku un lèns kolonial”, segun Kroon. “Un ehèmpel, si bo wak tribunal aki nan, tin segun mi un wes lokal so, esta si e t’ei kaba. Tambe mi ta di opinion ku e islanan BES ta kana hopi atras kompará ku islanan ku ta kai bou di outoridat Ingles ora ta trata outodeterminashon,” Kroon, ku ta klaramente desapuntá, ta bisa.

Kroon ta enfatisá ku hopi biaha hendenan lokal no ta okupá posishonnan importante, loke ta kontribuí na un sentimentu di eksklushon i inhustisia. 

Despensa pa sklabitut bèrgonsoso 

Na diferente okashon Kroon tabata enbolbí ku e aña di konmemorashon di pasado di sklabitut na Hulanda. E tabata traha huntu ku un grupo di hóbennan ku tabata konsehá e gabinete spesífiko di Rei di e manera korekto pa atendé ku e tópiko delikado aki. “Nos kier a informá e Rei i Prinsesa Amalia bon, di manera ku nan ta komprondé e konteksto aktual,” Kroon ta splika.

Sinembargo e realisashon di e despensa no a kana manera a spera. Kroon ta mira e despensa komo símbolo polítiko, sin ku ta wak mehorashon struktural riba e islanan òf pago di rehabilitashon. “Riba e dia mes a limpia e kayanan so na Boneiru kaminda e Rei mester a kore pasa, mientras a neglishá sobrá di e isla. I na Sint-Eustatius hendenan mester a warda oranan largu den solo kayente pasobra e Rei kier a bula un rònchi mas riba e isla,” Kroon, ku ta menta algun ehèmpel, ta bisa. ”E tipo di situashonnan aki ta demostrá ku ainda tin tiki komprenshon pa e seriedat di e pasado di sklabitut pa e desendientenan di esnan ku nan a hasi katibu i e nifikashon di despensa.”

Retonan ekonómiko i sosial 

Un otro tema importante den e kòmbersashon ta e dependensia ekonómiko di Boneiru, partikularmente di turismo. Kroon ta mustra ku den e sektor aki mayoria persona lokal tin solamente trabou ku suèldu mínimo, mientras posishonnan di propiedat mayoria biaha ta den man di estranhero. E ta boga pa un ekonomia sirkular kaminda ta invertí e ganashi di turismo bèk den e komunidat. “Si turismo di bèrdat ta nos win-all-be-all, laga nos krea e ora ei un fondo manera Norwega ta hasi esei ku entradanan di zeta. Nan tin un tipo di fondo kaminda e méritonan ta bai bèk den nan propio ekonomia,” e ta sugerí.

Rebalorisashon di kultura i ensenansa 

Kroon ta pone énfasis tambe riba e importansia di enseñansa den historia  i kultura lokal. E ta remarká ku e kuríkulo na hopi skol ainda ta konsentrá spesialmente riba historia Europeo, ku tiki atenshon pa pasado di sklabitut i e habitantenan original di Boneiru. “A kuminsá trese kambionan, posiblemente pa motibu di e aña di konmemorashon, i esei ta positivo.  Pero tin hopi trabou pa hasi ainda. T’asina ku e muchanan  no tin buki ofisial di historia di e isla. Nan ta siña awor hopi biaha via un fail pdf ku e dosente mes ta prepará,” Kroon ta bisa.

Partisipá den polítika na Boneiru 

Kroon ta konsiderá pa regresá Boneiru den futuro i kontribuí aktivamente na e komunidat, posiblemente komo polítiko òf dosente. E ta sinti un responsabilidat grandi pa inspirá e generashon mas hóben i siña nan di nan propio historia i posibilidatnan pa den futuro. “Promé ku regresá Boneiru pa semper, mi ke krese ainda den e trabou sosial ku mi ta hasi na Hulanda i traha e programa. Mi ta pensa tambe pa posiblemente optené mi diploma pa duna lès. Luna pasá mi a duna lès èkstra kaba na skolnan na Boneiru. Tabata trata di físika i kímika. Tambe mi a duna un lès di filosofia na Liseo Bonairiano. Alabes mi ta enbolbí tambe ku un partido polítiko i ke hinka mas tempu den esei e tempu benidero.”