Skibí pa Norwin Willem

Atrobe nos den sindikalismo ta tuma nota ku tin kompanianan ku no ta kumpli ku nos leinan vigente pa loke ta pago di salario riba e dia i fecha palabrá den e konvenio di trabou. E aktitut aki ta uno mas di abuso i eksplotashon di e klase trahadó. Dikon? Wèl e ta simpel pa tur hende komprondé. E dunadó di trabou ta sera un akuerdo ku e trahadó pa esaki produsí sierto trabou den un luna kontra pago di un salario akordá. Nos leinan laboral ta masha kla den esaki.

Artíkulo 1614p di nos kódigo sivil ta preskribí ku na kada pago di salario riba e fecha kunbiní mester paga e montante kompleto.  I no tin kuenta di paga pida salario i sigur no papia mes di un adelanto(voorschot). Un akto asina ta kontra nos leinan. Pa tal rason tambe artíkulo 1614q di e mesun kódigo sivil ta preskribí ku si e violashon aki ta falta di e dunadó di trabou, antó for di e di 9 te ku di 12 dia despues ku e pago mester a tuma lugá e trahadó por kobra un interes den forma di un but di 5% pa dia i pa kada dia despues di e di 12 dia e interes ta di 1% pa dia te na un máksimo di 50% di e salario ku debe e trahadó. Antó nos no kier tende e payasada ku no por a paga òf no por a paga kompleto pa motibu ku a oumentá e sueldo mínimo. Si esei ta e kaso, antó sindikalismo ta reta tur dunadónan di trabou ei pa ser transparente, habri nan bukinan i prueba ku sifra ku esei ta e kaso. Mas i mas sindikalismo ta hañando informashon ku tin dunadónan di trabou di mala fe ku ta enrikesiendo nan mes riba lomba di trahadónan i ta kreando un kòrtina di huma tirando falta riba sueldo minimo. Pronto sindikalismo lo denunsiá e práktikanan ku nòmber i fam.

Nos kier yama trahadónan di Delta Security Bonaire pabien ku nan logro, esta ku e union fuerte ku nan a demonstrá i ku a kuminsá dia 8 di sèptèmber den Parke di Lalan Clarenda aya na Nikiboko a keda koroná despues di 17 dia ku un rekonosementu formal i ofishal di AFBW komo e úniko sindikato ku legalmente por representá e trahadónan di Delta i negoshá kondishonnan laboral. Tur trahadó por ta testigu ku ta simplemente mester sera UNION i ta logra. Awor otro kompanianan por sigui e ehèmpel di e trahadónan balente i ku kurashi di Delta. Ta e úniko forma pa eksigi Rèspèt, Rekonosementu i Rekompensa hustu pa e klase trahadó den e ekonomia kresiente i fluoresente aki di Boneiru.

Nos por a tuma nota tambe di un yamada sinsero di e siudadano tenista Robby Domacasse ku ta yama trahadónan den sektor hotelero spesífikamente pa afiliá na un sindikato pa asina mehorá nan kondishonnan laboral, entre kual regla un bon penshun pa e trahadó ora esaki yega na su edat di retirá for di trabou. Nos ta apresiá ku mas i mas hendenan konsiente di e nesesidat di union ta yuda i duna un man den konsientisá e klase trahadó pa e uni su mes den un sindikato i asina partisipá den e desaroyo di Boneiru ku e tambe ta yuda konstrui ku su labor i asina haña un parti hustu ku ta tokele i su famia. Kada un di nos tin e derecho di biba un bida digno i di kalidat aki riba Boneiru. Hamas Boneiru por ta un isla kaminda ta bin gana plaka so i no kontribuí den alsa kalidat di bida di nos tur. Ganashi ku ta hasi na Boneiru pa un gran parti mester invertí bèk den desaroyo di nos isla. No tin diskushon riba esaki.