KRALENDIJK –  Den nos rúbrika ‘Bèk na Boneiru’ nos ta sigui personanan Boneriano ku a lanta na Boneiru, a traha òf studia den eksterior, pero despues ta bini bèk atrobe. Den e di djes seri nos a papia ku Xenah Cicilia. El a studia na Kòrsou, pero ta traha awendia komo konsehero di konseho insular na Boneiru. Abo sa, òf konosé un hende ku un storia úniko? Duna redakshon un tep.

“Mi no ta Boneriano, pero si un Rinconero” 

Xenah Cicilia a nase na Kòrsou, pero su lasonan ku Boneiru semper tabata fuerte. “Mi famia di parti di mi mama ta por parti di Kòrsou i di parti di mi tata ta kompletamente di Boneiru,” Cicilia ta konta. “Tempu ku mi tabata hopi chikí ainda, mi tata a muda bèk pa Boneiru i mi a pasa hopi fakansi serka dje. For di mi kuater aña mi tabata bula hopi biaha mi so bin Boneiru. Poko poko mi amistatnan na Boneiru a krese mas i mas.”

E eksperensianan tempran aki a stimulá su amor pa Boneiru. “Boneiru tabata semper un di dos kas p’ami,” e ta bisa ku un sonrisa. Sinembargo a dura basta promé ku Cicilia a muda. Na Universidat di Kòrsou el a siña International Business. E kier a tèrminá e estudio aki promé ku e kuminsá ku un aventura nobo.

Finalmente Cicilia a disidí di muda definitivamente na edat di 24 aña. El a finalisá su estudio ku éksito. “E fase final di mi estudio tabata bon mirá un storia chistoso,” segun Cicilia ku ta wak bèk ku satisfakshon riba su tempu komo studiante. “Mi tabata duda pa hopi tempu, pasobra mi mester a hasi un eskoho unda mi ta bai despues di mi temporada di studiante. Riba un sierto dia mi a solisitá mainta na Tourism Corporation Bonaire (TCB).  Ni un ora despues mi tabata den avion atrobe pa Kòrsou. E mèrdia ei mi mester a defendé mi tésis. Mi a slag pa ámbos parti. A tumami na trabou i mi a finalisá mi estudio. Tabata mesora e transishon definitivo pa Boneiru.”

Su promé empleo tabata na TCB, kaminda e tabata traha den Cruise Operations i Product Development. “Tabata un trabou interesante ku un presupuesto minimal. Mi a siña hopi di dje,” Cicilia ta bisa. Despues di dos aña i mei el a haña un chèns na Stinapa, e organisashon ku ta responsabel pa maneho di naturalesa na Boneiru. “Mi a kuminsá komo konsehero di komunikashon i bosero,” e ta splika. “Stinapa tabata enkontrá hopi resistensia di komunidat lokal i mi ròl tabata pa mehorá e komunikashon i krea brùgnan.”

Traha na Stinapa no a bai sin desafionan. “Den e temporada ei tabatin hopi resistensia kontra Stinapa, spesialmente bou di habitantenan lokal,” Cicilia ta bisa. “E hendenan tabata pensa ku Stinapa ta prohibí tur kos, for di hunta santu te kome karkó. Mi tarea tabata pa splika pakiko e reglanan aki t’ei i pa krea komprenshon.”

E ròl di bosero a trese tambe retonan personal kuné. “E trabou tabata bira hopi biaha personal,” e ta partisipá. “Ora mi no tabata enbolbí, pero si mester a splika e desishonnan, esei sa bira tin biaha difísil.”

Konsehero di Konseho Insular

Despues di kasi sinku aña na Stinapa Cicilia a hasi e kambio pa un ròl nobo: konsehero di konseho insular i konsehero di komunikashon i protokòl. “Mi funshon ta kompletamente a-polítiko i neutral,” e ta splika. “Mi ta traha pa henter konseho insular, no pa un partido spesífiko.”

Ounke e no tin ambishon polítiko aktualmente, Cicilia no ta ekskluí e posibilidat den futuro. “Mi no por bisa ku mi no ke bira gezaghebber nunka,” e ta bisa. “Pero pa awor mi ta pone mi atenshon riba mi ròl aktual i mi desaroyo personal.”

Ambishonnan nobo 

Apesar di su posishon bunita na konseho insular, ta parse ku Cicilia tin plannan grandi pa futuro. “Mi ke start mi propio empresa den komunikashon i maneho di krísis,” e ta revelá. “Mi ta gusta proyektonan di término korto i solushoná krísis.”

Cicilia su agènda mester ta relativamente yen. Banda di su trabou fultaim e tin tambe un yu hòmber chikitu di dos aña. Banda di esei e ta presentá djasabra na Live99.fm un programa di radio. I si esei no ta sufisiente ainda, e ta realisá lansamentu di su propio podcast, ‘Safe Space Ku Xenah’. E podcast ta trata tópikonan ku normalmente no ta diskutí den nos komunidat,” e ta splika. “Mi ke krea un espasio seif kaminda personanan por papia habrí di nan eksperensianan i por kompartí lèsnan.”

Kreativo 

Den su tempu liber Cicilia gusta di ta kreativo. “Mi gusta krea kos, sea ku ta ku mi mannan òf ku kòmpiuter,” e ta bisa. “Huntu ku mi primanan mi ta dirigí un empresa chikitu ku yama ‘Crafty Cousins’, kaminda nos ta organisá fiesta i traha regalonan trahá na man.”

E salida kreativo aki ta yudé pa mantené un balansa salú entre trabou i privá. “Mi ta kere fuertemente den protehá mi pas mental,” e ta bisa. “Si mi no gusta algu òf e ta hasi daño na mi salú mental, simplemente mi no ta hasi’é.”

Kurason den Rincon 

Remarkabel ta ku Cicilia a skohe pa no biba den e sentro drùk di Kralendijk (Playa), pero hustamente na e otro banda di e isla. Loke e ta apresiá mas tantu einan ta e sentimentu di kompañerismo. “Rincon ta un lugá kaminda tur hende ta pèrkurá pa otro,” e ta bisa. “Si algu pasa, bo sa ku bo bisiñanan t’ei p’abo.”

E sentimentu aki di kompañerismo ta un di e motibunan pakiko Cicilia a skohe pa keda Boneiru. “Mi ta mira mi mes keda akinan e próksimo djes añanan,” e ta bisa. “E isla tin asina hopi pa ofresé i mi ke keda duna un kontribushon positivo na e komunidat.”