KRALENDIJK – Mas ku 700 partisipante a baha na awa djadumingu mainta pa landa bai Klein Bonaire for di Eden Bich. E evento, ku hopi a kalifiká komo un éksito, no a enkontrá niun problema i tur kos a kana fásil, danki na e preparashonnan ámplio i e medidanan di siguridat. Segun e presidente Björn Saragoza e evento tabata sumamente éksitoso.

“Nos ta hopi kontentu,” Björn Saragosa, ku ta e presidente di e organisashon, ta bisa un ora despues ku e último landadó a yega kantu. “Nos tabatin mas ku 700 partisipante i esei ta meskos ku aña pasá. Ta tremendo pa wak kon enbolbí tur hende ta.”

Koriente serka landadónan di kompetensia

E aña aki 57 landadó di kompetensia tambe a partisipá. Na momento di landa bèk nan a haña nan ku un koriente fuerte ku a laga nan drif bai direkshon di nort. E organisashon a dediká  atenshon èkstra na siguridat. “E siguridat di e landadónan tabata e kos mas importante pa nos,” segun Saragoza. “Nos tabatin un reunion ku tur doño di boto i kayak i e hóbennan di Jong Bonaire tambe a yuda. Nos ta kontentu ku nos spònsernan. Nan a hasi e evento posibel.”

Koen Verhoeven ta defendé su título. Serka e kabayeronanKoen Verhoeven tabata e aña aki atrobe esun mas rápido. Aña pasá el a finalisá den un tempu di 22 minüt i 7 sekònde. E aña aki e tabata un tiki mas rápido. Verhoeven  a taim un tempu di 21 minüt i 12 sekònde. “A bai bon si. Pero na final e koriente a ponemi  landa un tiki direkshon di Chogogo. Sinembargo mi a haña e sirkumstansianan mihó ku aña pasá, na momento ku tambe tabatin hopi koriente. Mi meta durante e kompetensia tabata pa landa mas rápido ku ta posibel,” segun e ganadó.

Marieke van Bemmel ta gana pa promé biaha. Serka e damanan Marieke van Bemmel ta gana. El a taim un tempu di 29 minüt i 22 sekònde. Pa van Bommel e tabata su promé título pa e Landamentu pa Klein Bonaire. “Tabata pa di dos biaha ku mi a partisipá na e evento. Nos ta sinti falta aki di un grupo di mucha muhé ku ta partisipá na un torneo di polo akuátiko. Normalmente nan ta mas rápido kumi. Pero pasobra nan no t’ei, ami tabata awe esun felis ku e promé premio. Mi a haña e landamentu bai Klein Bonaire relativamente fásil. Pero na kaminda pa bai bèk nos no por a mira bon unda nos mester a landa debí na e solo abou. Banda di esei e koriente tabata pusha nos direkshon nort. Finalmente mi a yega promé si.  Otro aña mi t’ei atrobe i e ora ei mi ta bai purba meskos ku e aña aki pa landa mei minüt mas rápido.”

Preparashon largu

Partisipantenan a paga 20 dòler pa inskripshon, di kua un parti ta bai pa un bon kousa. “E ta bai pa e hóbennan di Klein Bonaire pa material i aktividatnan,” Saragoza ta splika. “E entradanan ta bai pues bèrdaderamente pa hubentut.” Riba e pregunta ku si e evento lo ta mas grandi otro aña, Saragoza ta kontestá prudente: “Loke ta mas importante ta siguridat. Podisé nos ta mantené e kantidat na 800 partisipante pa garantisá esei. Nos ta bai evaluá esei otro aña di nobo.”

Organisashon di e Landamentu pa Klein Bonaire no ta fásil. Ku un preparashon di kuater pa sinku luna e evento ta un di e eventonan deportivo di mas grandi na Boneiru. “Esei ta pa motibu ku e ta duna e hendenan un sentimentu di apertura di regata,” Saragoza ta bisa. “Nos ta orguyoso di loke nos a logra e aña aki i ta ansioso pa futuro.”