“Mi ta haña sumamente riku na kreatividat, pero hopi pober na wes’i lomba periodístiko, di parti di un redaktor apresiá di un kanal di media aki na Boneiru, pa desviá di tur e inhustisianan ku ta asotando tantu e mes, komo su rumannan i famianan lokal boneriano, manera entre otro: 

• un salubridat ku ta parse di no tin salú i bida di e hende lokal boneriano realmente na pechu;
• ⁠un salubridat ku sa manda hende, ora ya ta lat kaba, bai buska milager na Colombia, pero ku no ta pensa mes di trese e dòkter i spesialistanan kolombiano bin hasi milager aki na Boneiru, pasobra nan no tin ‘BIG-registratie’;
• un salubridat ku ta preferá manda hulandes oropeo bin kore stazje na Boneiru, sabiendo ku nan no por komuniká ku e pashèntnan lokal, prinsipalmente esnan di edat;
• un salubridat ku ta duna kasa mortuario aki na Boneiru un impulso tremendo último tempu;
• un gabinete nobo ku a kuminsá ta kita bèk tur e kiriwichinan ku e boneriano a logra haña despues di tabata tantu aña manera mendigo integrá, kontra su propio boluntat i ankrá den Konstitushon hulandes, riba un base desigual ku e hulandes oropeo;
• un gabinete nobo ku ta insistí na oumentá impuesto riba entrada di kualke persona riba islanan BES ku ta gana mas ku 50,000 riba e suma liber di impuesto pa aña, un medida kontra kua e tres islanan a protestá fuertemente, pero sin éksito;
• opshon di e gabinete aktual pa drai bèk e oumento di ‘Vrije Uitkering’ ku e gobièrnu anterior a primintí islanan BES. 

Pa tur e atrosidatnan akí – anto tin muchu mas – e ta skonde su rabu periodístiko i keda sin publiká, pa bai laga hustamente ‘Monchi & Tonchi’ hunga ròl di Bomba Chistoso, hinka dede, hasi mofa i ventilá su despresio profundo, kombiná ku un envidia ardiente kontra gobièrnu aktual (sin menshoná nòmber, pero tur hende sa ta ken) i Jimmy ku Viki (tambe tur hende sa). Ta sumamente riku di su parti, pa purba trapa su propio rumannan, produktonan di su propio kultura, ku e ta bisa ku e ta biba i ku e ta stima, miéntras e ta lembe i tapa atrosidatnan di esnan ku e no sa ni ki patu a brui nan. Sumamente riku, pero pober na wes’i lomba periodístiko na mi konsepto, señor redaktor. 

Ki dia nos ta logra saka e kadena di sklabitut fo’i den nos kabes? Ki dia nos ta logra habri nos wowo i mira e simia di divishon plantá den nos komunidat, ku ta pone famia bringa famia, bisiña lastra bisiña anto permití reglanan inhustu basha riba nos tur? Ki dia nos ta realisá ku, bringando otro dje forma akí, nos aki na Boneiru, ta un pueblo i un kultura ku ta muriendo? 

S.B. Marten, 2024