E pregunta ta enserá e kontesta. Por tende e bos abou pa un referèndem nobo kaba den pueblo. Pero ainda tin hopi konfushon i inseguridat. Kiko lo mester logra ku un referèndem asina? Unda nos lo mester bai e ora ei?

Tin un solushon? Si ta buskando un solushon, lo mester tin un problema. Kua problema? Si nos puntra e hendenan kiko nan ta opiná di e sistema estatal aktual (‘OLB’), e kontesta kasi semper ta: ‘E tin bentaha i desbentaha’. Si nos puntra si no a bini kambionan, e kontesta ta: ‘Tin kos ku ta mihó  otronan ta pió’. Si mi puntra si nan ta satisfecho, e ora ei e kontesta ta: ‘Si i nò; no di bèrdat’.

Den su totalidat ta rekonosé ku Boneiru a bai dilanti. Di otro banda nan ta haña ku Boneiru no ta Boneiru mas. E influensia di e ‘Hulandesnan Europeo nobo’ (= esnan ku a bini despues di ’10-10-10’), a bira muchu grandi. Di otro banda ta rekonosé ku enseñansa a bira mihó. Salubridat tambe, aloménos den kuminsamentu. Despues esei a bai rápidamente abou. Awor tin si mas i mihó material pa kuido, pero e empatia a disparsé. E pashènt a bira un number. 

Den un palabra, ta tempu pa hasi preguntanan estatal. Pero no tin base polítiko ainda pa akshon riba e tereno aki. Esaki ta bai bini dimes. Nos ta warda ku pasenshi riba un generashon di polítiko hóben ku ta tuma tempu pa lesa e buki ‘In Synergia Unanimus’.

Bo ta hañ’é aki (Papiamentu): https://www.arcocarib.com/ebooks/in-synergia-unanimus-pap/

I aki (Ingles): 

https://www.arcocarib.com/ebooks/in-synergia-unanimus

Sugerensia. Enbes di oranan ku dibertishon riba Youtube, lesa un biaha un buki. Solamente 52 página.

Boneiru, 13 di òktober 2024

Michiel Bijkerk