KRALENDIJK – Dutch Caribbean Nature Alliance (DCNA) ta invitá skolnan básiko i amantenan hóben di naturalesa di Aruba, Boneiru, Kòrsou, Saba, St. Eustatius i Sint Maarten pa partisipá na e Big Live Nature Quiz – Kids Edition GRÁTIS riba djabièrnè 1 di novèmber 2024! E evento plasentero i edukativo akí ta brinda nos muchanan e oportunidat pa siña mas tokante naturalesa, miéntras nan ta kompetí kontra otro hóbennan di nan edat for di henter Karibe Hulandes. 

Dikon partisipá na e Big Live Nature Quiz?

Intenshon di e kwes ta pa inspirá nos muchanan i siña nan tokante e ekosistemanan úniko di Karibe Hulandes, ku e tema “Naturalesa su habitantenan lokal, habitantenan nobo i intrusonan”. E muchanan ta deskubrí echonan fasinante tokante espesienan endémiko, eksótiko i invasivo, i nan ta siña kon nan mester protehá medio ambiente di nan isla pa medio di preguntanan interaktivo, basá riba konosementu general. 

Un berdadero esfuerso di tim

E inisiativa akí ta un kolaborashon entre e seis islanan di Karibe Hulandes i DCNA su partnernan di naturalesa: Aruba Conservation Foundation, CARMABI, STINAPA, Saba Conservation Foundation, St. Eustatius National Parks Foundation (STENAPA), i Nature Foundation Sint Maarten. E esfuerso akí a bira posibel tambe danki na partisipashon di e skolnan básiko lokal i Dutch Caribbean TV  i e ta haña finansiamentu di parti di Ministerio di Agrikultura, Peska, Siguridat di Kuminda i Naturalesa i Nationale Postcode Loterij di Hulanda.

Detayenan di e kwes:

• Fecha: Djabièrnè 1 di novèmber 2024
• Ora: 8:30 – 9:15 di mainta (AST)

Ken por partisipá?

• Alumnonan di grupo 7 i 8 (sistema ingles: grades 5 and 6)
• Tim di maksimalmente 4 mucha òf partisipante individual
• E skolnan por inskribí mas ku un tim
• Inskripshon ta obligatorio – e dosentenan mester inskribí nan timnan via www.BigLiveNatureQuiz.org 

Ki tipo di pregunta?

E kwes ta konsistí di pregunta ‘multiple choice’ basá riba e revista BioNews Kids di DCNA (edishon di 2024). Preparashon no ta nesesario, pero si e muchanan lesa e revista, esei por yuda! Promé ku e kwes e skolnan ku ta partisipá ta risibí algun ehemplar imprimí di BioNewsKids, i tambe e ta disponibel online na ingles, hulandes, papiamentu i papiamento. 

Premionan fantástiko!

E tim ganadó ta haña un paseo riba boto di bela ku snòrkelmentu huntu ku nan dosente, i tin sèt di snòrkel pa gana!

Partisipashon ta grátis, pero inskripshon ta obligatorio. Dosentenan por inskribí nan timnan online via www.BigLiveNatureQuiz.org.