KRALENDIJK – Djadumingu 20 di òktober ta tuma lugá e evento di mountain bike di mas grandi di Boneiru: Duo Xtreme Bonaire 2024. Timnan di Boneiru, Kòrsou i Aruba lo kompetí kontra di otro den duo riba dos diferente ruta: e “ruta deportivo” di 55 km i e “ruta elite” di 76 km pa siklistanan mas eksperensia.

E kareda ta kuminsa pa 6:30 di mainta na Karel’s Beach Bar, ku tambe ta e punto final di e kareda. Varios punto di kòntròl i tambe awa ta disponibel pa partisipantenan kantu di e ruta. Den e ultimo simannan, boluntarionan a hasi e rutanan limpi pa garantisa bon pasashi y siguridad, pa e siklistanan por presta optimalmente.

Partisipantenan por buska nan number di kareda djasabra 19 di òktober di 5:00 PM pa 7:00 PM na Karel’s Beach Bar. Durante inskripshon e number di kareda lo wordo suministra despues di pago. Ta importante pa e number ta bon visibel riba e baiskel, ya ku e ta kontené tambe e chip di tempu personal.

Bonaire Bicycle Club ta invita espektadornan pa sigui e kareda riba e ruta of pa asisti na e seremonia di premiashon. Esaki lo tuma lugar entre 12:00 y 13:00 na Karel’s Beach Bar, unda lo honra tambe e ganadornan den varios kategoria.

Duo Xtreme Bonaire ta un magno evento deportivo riba e isla pa añanan kaba. Organisashon di un evento na e eskala grandi asina’ki ta posibel danki na e esfuersonan di boluntarionan i e sosten di nos spònsernan pa e edishon di 2024, inkluyendo Karel’s Beach Bar, Sunbelt Realty Bonaire, De Freewieler, Pink Coral iT, Mega Hit FM, The Wine Factory, Powerade, Bonaire Logistics and Wholesaler, Olovka, C3 – Critical Communication Caribbean, FX Sports Bonaire, Wire Interiors Bonaire, GenKoo Generatoren, Allways Transport i Rocargo Services.

E ta priminti di bira un dia bunita i deportivo. Un i tur por pasa i disfrutá di e kompetensia i e seremonia festivo di premiashon na Karel’s Beach Bar!