KRALENDIJK – Na Plaza Beach & Dive Resort Bonaire di e konsorsio Van der Valk, a hasi hopi renobashon. Ku esaki e kompania ke bai habri e portanan nobo riba término korto. Plaza ke aloha kada tipo di turista. Pero ku e renobashonnan aktual e por dirigí su mes mas riba ofresé un eksperensia úniko i luhoso. Eloise van der Valk ku ta gerente operashonal di e resort i Eva Boxem, supgerente di benta i merkadeo, ta duna un bista den e plannan pa futuro.

E lèternan grandi BONAIRE ta posishoná dilanti di e entrada di Plaza Beach & Dive Resort Bonaire renobá. E edifisio nobo, ku e entrada espasioso, ta duna un aspekto luhoso. Na banda di e resepshon tin un waterval grandi situá. Tambe a traha un sala di gemnastik nobo, un pakus i un spa. Banda di esei e resort ta bai konstrui den futuro un kasino nobo. Ku e fasilidatnan renobá Van der Valk nobo ke por konsentrá su mes riba kada grupo di meta. E resort no ta enfoká solamente riba wéspetnan all-inclusive, pero riba kada tipo di biahero.

Famia van der Valk tin e ambishon pa hiba e resort na Boneiru un nivel mas haltu. Banda di esei nan ta laga sa di mustra rèspèt pa e bunitesa natural i e karisma úniko ku e isla tin. “Nos a skohe pa renobá e resort, pasobra Boneiru ta un lugá mágiko ku meresé un resort bunita. Tur hende mester sinti nan mes bonbiní serka nos i relahá kompletamente,” van der Valk ta laga sa.

Pakus i restorant 

“Nos pakus nobo ku yama Trento por ehèmpel ta bira un di nos puntonan kulminante,” Boxem ta konta entusiasmá despues ku nos a drenta na e entrada nobo. “E no ta un pakus djis gewon asina, pero un lugá luhoso, kaminda bo por haña tur loke ku bo ta deseá. Famia Van der Valk a hasi un selekshon personal di artíkulonan di interior, paña i asesorio. Sierto produkto bo ta mira bèk tambe den e resort. E enfoke ta riba kalidat i e toke lokal. Pronto nos lo habri e portanan di e pakus aki tambe.”

“Ademas nos a habri restorant Momento na dezèmber,” Van der Valk ta añadí. “Meskos ku nos resort e restorant ta pa tur hende. Momento ta ofresé kushinamentu bibu. E restorant tin un bista panorámiko ku un bista presioso riba bahada di solo na Boneiru. Banda di nos propio wéspetnan, nos ta invitá e poblashon lokal pa bin kome algu akinan.”

Sala di gemnastik i spa nobo 

E renobashonnan nobo ta enserá tambe un sala di gemnastik nobo i fasilidatnan di spa. “Nos sala di gemnastik tanten ta spesialmente dirigí riba wéspetnan di hotel,” segun Boxem. Pero no solamente e sala di gemnastik ta un di e renobashonnan. “Otro aña lo amplia e resort ku un spa luhoso pa wéspetnan di hotel i pa e komunidat lokal,” Van der Valk ta agregá. “I e spa ta ofresé tratamentunan manera masashi i fasial.”

Casino

E empresa ta preparando pa konstruí un kasino nobo. “Pero esaki ta tuma un tiki mas tempo,” Van der Valk ta splika. Na parti dilanti di e tereno bo ta mira un edifisio grandi pará ainda. Aki un par di aña e kasino nobo ta bini akinan. Esaki lo bai bira enteramente otro ku e kasino bieu. Nos ta mira ku na Boneiru tin e nesesidat di un sitio kaminda hendenan por bini huntu anochi pa rekreashon i dibertishon. Nos meta ta pa krea un kasino ku ta ofresé un eksperensia total, ku dibertishon i un ambiente agradabel.”

Ampliashon di kambernan 

Un otro punto kulminante ta e ampliashon di e kapasidat di akomodashon. “Nos ta finalisando nos último piso (penthouse),” Boxem ta bisa. “Despues di e renobashonnan aki nos tin 283 kamber, ku kua nos por i ke alkansá tur grupo meta.”

Banda di e pakus renobá, spa, sala di gemnastik, kambernan i e restorant a dediká hopi atenshon na durabilidat. “Nos tin panelnan solar riba dak,” Boxem ta splika, “E plan kompleto ta enserá plannan pa propio produkshon di energia i purifikashon di awa. Van der Valk ta añadí: “Nos ta hasi esfuerso pa bira 80% outosufisiente.”

Tambe pa habitantenan lokal 

E resort no ta konsentrá solamente riba turista, pero tin tambe dilnan spesial pa e komunidat lokal. “Ku pasnan di dia all-inclusive wéspetnan lokal por gosa di nos fasilidatnan. Nan por hasi uso di e pisina, restorant i e dibertishon ku nos ta ofresé. Regularmente nos lo organisá tambe aktuashonnan di DJ òf otro eventonan agradabel rondó di pisina,” Van der Valk ta konta.

Ku e plannan ambisioso Plaza Beach & Dive Resort Bonaire ke destaká su mes komo un destinashon úniko riba e isla. “Nos ke posishoná nos mes no solamente komo un resort high-end ku ta distinguí su mes mediante luho i durabilidat,” Van der Valk ta konkluí. “A konstruí e resort aki pa Boneiru i pa e personanan ku ta hasi e isla asina spesial. Nos soño ta ku tur hende ta sinti nan na kas aki nan, sea bo ta un wéspet di hotel òf un habitante lokal.”

No ta konosí ainda kuantu trahadó èkstra Plaza Beach & Dive Resort Bonaire ta bai  haña despues di e ekspanshonnan. E resort ta laga sa di ta studiando esaki ainda. No ta konosí tampoko ki dia e resort ta habri presis. A indiká si ku e empresa ta asumí ku e siman benidero ta habri e portanan di Plaza.