The Bottom, Saba- Krio di kabritu na Saba, na un forma responsabel, no ta nada fásil na Saba. Esaki e kriadónan di kabritu Roderick Hassel, Jerry Hassel, Orlando Hassell, Timothy Johson, Justin Yu i Anna i Matthew Barnes sá di nan propio eskperensia.

Nan tur ta kria kabritu, dor ku nan stima bestia, pero ta duru pa gana algu di sèn ku esaki. “Ami a lanta ku kabritu, i pesei mi ta stima nan”, asina Orlnado Hassel (28) a ta konta. Orlando ta kriando kabritu for di su 20 aña.

Jerry Hassell (47) tin solamante dos aña ta kriando kabritu na Saba. “E ta tuma su tempu. Mi ta mira nan manera otro bestia di kas, manera pushi ku kachó, aunke e kabritunan ta keda pafo”,.

Reto

E doñonan di kabritu na Saba a splika di e problemanan ku nan ta enkontrando den loke hopi di nan ta deskribiendo komo nan hòbi. Kriamentu di kabritu pa gana sèn ku esaki, ta basta difisil riba e isla. Asina gastunan, entre otro pa kuminda di bestia, ta hopi haltu na Saba. “Kasi tur kos mester importá for djafó, en general for di Merka òf Puerto Rico”, asina Roderick ta splika. Otro problema ta falta di sufisiente yerba, voral durante temporada ku e isla ta seku.

Tin doño di kabritu ku ta gasta un 100 dòler pa dia na kuminda pa e kabritunan, loke ta hasi e krio di bestia un aktividat basta karu. Pa por gana algu, hopi di e doñonan sa mata kabritu pa manda e karni St. Maarten, pa bende esaki na e isla bisiña. Ayanan e merkado ta mas grandi i bo ta haña mihó prèis, asina Justin ta splika.

Naturalesa

Tur e doñonan di kabritu ku a wòrdu entrevistá ta mira kanamentu di kabritu den naturaleza komo problema. Ta mihó pa tene nan será riba bo kunuku. Kabritu ku ta kana lòs ta kousa hopi problema pa Saba. Nan ta daña hardin di hende, anto dor ku nan ta kome kasi tur kos, nan ta kousa eroshon tambe”, asina Anna ku Roderick ta bisa.

Resientemente gobièrnu di Saba a kuminsá ku un programa pa tira kabritu ku ta kana lòs riba e isla, den un intento pa kontrolá e problema di eroshon. Esaki ta kondusiendo na hopi emoshon i reakshon negativo den komunidat. Tin hende ta di opinion ku e forma di kria kabritu ku ta kana lòs den naturaleza ta ‘pas’ den e cultura loka di e isla. Tin otronan, sin embargo, ku no ta di akuero ku esaki. “Echo si ta ku tin demasiado kabritu riba e isla anto nan a para bira un problema”, asina Anna ta konta.

Kontrolá

Dor di kontrolá e kanamentu lòs di kabritu i stimulá krio di kabritu di forma responsabel i kontrolá, Saba ke trese un kambio positivo den kriamentu di kabritu riba e isla i tambe yuda trese mas produkshon lokal. Prèis di kuminda na Saba ta esun mas haltun den tur 6 isla di e anterior Antia Hulandes.