KRALENDIJK- Djadumingu pasá a tuma lugá e kareda di mountain bike Duo Xtreme Bonaire 2024. E aktividat a atraé 80 participante, inkluyendo siklistanan ku a biaha for di Aruba, Kòrsou, i Hulanda. Hopi di nan a transporta i partisipa ku nan propio baiskel.

E aktividat anual  aki ta ofresé siklistanan di diferente nivel – di nivel hopi rekreativo te ku esnan mas  eksperensha i kompetitivo – oportunidat pa partisipa. Tambe tabatin e opshon entre dos ruta. E ruta kortiku pero tèknikamente difísil di 55 km a inkluí e subida na banda nort di Seru Largu, mientras ku e ruta mas largu di 76 km a hiba siklista na e area entre Sabadeco y Arawak konosi komo ‘De Hel’ (e fiernu).

Durante di e kareda, tabata tin 46 boluntario ku a asistí e partisipantenan na pòstnan di awa. Na final, partisipantenan a reuni pa e seremonia di premiashon, unda e ganadonan a risibí nan premio.

Loke ta hasi e evento aki speshal ta e manera ku e ta uni deportistanan pa un desafio pisa, mientras ku e ta fortalece e lasonan entre nos islanan. Duo Xtreme ta tuma lugá anualmente na Boneiru, Kòrsou, i Aruba. E pròksimo evento lo tuma lugá dia 3 di Novèmber na Kòrsou, i prome di Desèmber ta toka turno pa e Duo Xtreme di Aruba.

E kareda na Boneiru ta organisá pa Bonaire Bicycle Club, un grupo ku ta inklui Frank Böhm di De Freewieler, kende ta organisando e Duo Xtreme na Boneiru pa hopi aña kaba.

Eksitoso

Duo Xtreme Boneiru 2024 a resultá ekitoso danki na e dedikashon di boluntarionan balente i e sosten di spònsernan.