KRALENDIJK – E situashon rondó di e lugá di tira sushi di Selibon na Boneiru ta alarmante, spesialmente ku e karta resien ku a drenta di e Asosiashon Pro Lagun. Nan ta ekspresá nan preukupashon serio pa rísikonan di salú pa e habitantenan di Boneiru i ta eksihí medidanan pronto i fuerte di gobièrnu. Den un reakshon Diputado Nina den Heyer a laga sa: “Nos ta kompartí e preukupashonnan.  Pero e rapides ku e Asosiashon Pro Lagun ke no ta alkansabel.”

Den e karta “E salú di e Boneriano ta na peliger”, Asosiashon Pro Lagun ta hasi un yamada na gobièrnu pa akshon inmediato. “E problema na e lugá di tira sushi ta leu di ta solushoná,” segun e organisashon, ku ta enfatisá ku esnan ku ta biba den besindario ta enfrentá pa añanan largu kaba e molèster di holó stinki i huma peligroso pa motibu di kandelanan bou di tera. Segun e organisashon e rísikonan no ta limitá na esnan ku ta biba serka di e lugá di tira sushi so, pero ku ta tur habitante di Boneiru, asta den barionan ku ta mas leu manera Nikiboko i Antriol, ta enfrentando aire sushi i posibel kontaminashon di produktonan agrario.

Reakshon di diputado Nina den Heyer

Nina den Heyer, diputado di Boneiru, ta konfirmá ku gobièrnu ta na altura di e karta i ku internamente tin kòmbersashonnan ta tumando lugá pa loke ta trata e preukupashonnan ku a bini dilanti. “Nos a tuma nota di e karta di Pro Lagun i ta rekonosé e preukupashonnan ku tin pa loke ta trata e rísikonan pa salú i kontaminashon pa motibu di e lèntfel”, Den Heyer ta bisa. e ta enfatisá sinembargo ku sierto di e eksigensianan ku Pro Lagun ta plantia no por realisá riba término korto.

“Den liñanan grandi nos ta kompartí e preukupashonnan i e nesesidat pa solushonnan, pero e tempu den kua nan ta ferwagt ku por logra esaki no ta alkansabel,” segun den Heyer. “Nos ta dependé di diferente partido i mester traha ku koutela pa logra resultadonan permanente.”

No opstante den Heyer ta primintí ku e kòmbersashonnan ku Pro Lagun lo tuma lugá. “Nos a tuma nan yamada na serio i ta bai hiba kòmbersashon ku tantu habitante- komo e instansianan enbolbí. E tin nos atenshon kompleto.”

ILT: Rísikonan grandi pa Medio Ambiente i Salubridat 

Banda di e karta di Pro Lagun, a sali tambe un rapòrt di  Inspekshon Bibienda i Transporte (ILT). Aki den ta kondená e situashon na Selibon fuertemente. Segun ILT e kompania di prosesá sushi ta konfrontando fayonan serio ku ta trese salubridat públiko i medio ambiente dirèkt den peliger. E Representante di Reino di Boneiru ta anunsiá ku saliendo for di e rapòrt di inspekshon e ta ferwagt reakshonnan rápido di kolegio ehekutivo i/òf Selibon.  

E rapòrt ta mustra riba kònteinernan di laman ku sushi biomédiko ku ta lèk, entre nan material ku tin drumí einan mas ku un aña den mal estado. Ademas tabatin diferente kandela riba e lugá di tira sushi ku ainda no ta pagá kompletamente. “E molèster di huma i holó stinki ta keda un problema pa e habitantenan,” tin pará den e karta di ILT. Tambe a hasi menshon di sushi den e bahia di Lagun ei serka, ku konsentrashonnan haltu di metal pisá den e awa, loke por ta dañino pa naturalesa i salú di e habitantenan.

ILT a manda su konklushonnan pa e Representante di Reino interino Jan Helmond i kolegio ehekutivo. E último aki ta bai hiba kòmbersashon ku e Representante di Reino pa palabrá e siguiente stapnan nesesario. “E situashon ta preukupante i ta rekerí akshon rápido,” segun e rapòrt. Helmond ta spera di por duna mas klaridat na prinsipio di novèmber riba e siguiente pasonan.

Akshonnan den futuro 

Pro Lagun a insistí riba un investigashon ámplio di medio ambiente i salubridat serka RIVM i ta eksihí ku ta tuma medida dentro di 30 dia, bou di nan paga e kandelanan i relokashon temporal di habitantenan rondo di e lugá di tira sushi. Diputado den Heyer no a bisa si por aktua kaba dentro di 30 dia. Sí e ke hiba e kòmbersashon ku e organisashon: “Den liñanan grandi mi por bisa si ku nos ta kompartí e preukupashonnan i ta kompartí e indikashonnan pa solushon tambe. Loke nos mester papia di dje ta e lapso di tempu ku ta spera. Den realidat sierto eksigensia òf pensamentu no por realisá asina lihé. Pero riba eseinan nos ta bai papia.”