DEN HAAG – E islanan Karibense ta haña un impulso di 24 mion euro pa engrandesé produkshon lokal di kuminda. E meta ta pa redusí e dependensia di importashon karu i atendé ku e preisnan haltu di kuminda, segun sekretario di estado Zsolt Szabó durante e debate di presupuesto ayera.

Ta usa e montante aki pa sostené inisiativanan, ku ta dirigí riba kultivo di bèrdura i fruta riba propio suela, ku ayudo di métodonan manera hidrokultura. E manera aki di kultivá, kaminda matanan ta krese den awa ku ta riku na nutriente, ta redusí e dependensia di importashon i ta kontribuí na baha e gastunan di kuminda básiko, e sekretario di estado ta pensa.

Manera ta konosí ta resultá ku e gastunan pa produkto fresku ta hopi haltu riba e islanan. Na Boneiru e sekretario di estado a paga 16 dòler pa un kilo di sperziebonen den un supermerkado lokal i 3,50 dòler pa un liter di lechi. Segun Szabó esaki ta kondusí na insiguridat serka habitantenan, sigur ora tin retraso den transporte via barku. Stimulando produkshon lokal, gobièrnu ta spera di no solamente baha preisnan, pero tambe di mehorá e siguridat di kuminda.

E medidanan aki ta parti di un strategia mas ámplio pa fortifiká e kapasidat ekonómiko pa para riba bo mes pia i prosperidat di e islanan. E gabinete ta hasi esfuerso tambe pa reformashon den sektornan manera turismo, konstrukshon i transporte, kaminda ta hasi uso di eksperensianan di tempu di corona.