Ta reinando un preokupashon serio serka sidnikalismo despues di a skucha e desaroyonan den sektor di turismo aki na Boneiru. Despues ku e ofisina di Turismo a tene un kumbre a bin sali na kla entre otro ku apesar ku turismo ta aportá ku 40% den nos ekonomia total e sektor no por drecha kondishonnan laboral di trahadónan den e sektor aki.

Ku asombro, pero aun mas ku un preokupashon grandi sindikalismo por a skucha ku e sektor solamente por kumpli ku e kondishonnan primario di e trahadó. Esaki ta nifiká ku e sektor por kumpli ku solamente pago di salario, dianan di vakashon preskribí pa lei, pago di 80% di e salario den kaso di malesa i/o desgrasia i otro obligashonnan preskribí pa nos leinan laboral i leinan den kódigo sivil. Ku e informashon aki, sindikalismo por konkluí ku e sektor apesar di ta floresente manera ta ser bisá, no tin e kapasidat pa bini ku areglonan sekundario pa loke ta kondishonnan di trabou. Kondishonnan manera paga 8.33% di kompensashon di fakashon, brinda un di 13 luna den forma di un bonus di Pasku.

Pa no papia mes di un fondo di penshun pa ora e trahadó yega edat di penshun e por kobra banda di penshun di behes ku gobièrnu ta duna, un penshun di e kompania ku e huntu ku e dunadó di trabou a spar pe durante su añanan di servisio. Loke tambe sindikalismo a konstatá ku e nivel di desaroyo personal di e trahadónan den e sektor aki ta hopi abou, ku e dos konsekuensianan ku nan ta keda pegá pa años na e sueldo minimo, pero alabes no ta haña e oportunidat di krese den e funshonnan ku e sektor ta brinda. Esaki ta trese kuné ku apesar ku e sektor aki ta esun mas grandi di empleo, mester importá labor di afó pa bin okupá diferente funshon den e sektor. Sindikalismo ta lamentá ku despues ku mas ku 50 aña a traha pa konstruí e sektor aki, ainda no tin un instituto ku ta dirigí su mes pa duna siñansa i formashon den funshonnan ku e sektor turístiko ta brinda den mas amplio sentido di palabra. Tin un asosashon di doñonan di hotèl i otro organisashonnan ligá ku nos turismo i esei ta BONHATA. Sindikalismo mester aserká e asosashon aki pa kuminsá un diálogo pa sondea kon tantu e invershonista komo e representantenan di trahadónan, mester posishoná nan mes pa huntu enfrentá e retonan den e sektor aki pa den futuro. No por ta asina ku ta krea kondishonnan faborabel pa atraé invershonistanan i tambe ta invertí fondonan kuantioso pa merkadeá e produkto Boneiru pa atraé bishitantenan pa bin konosé nos i gasta riba nos isla i no ta envolví e ser humano ku ta esun sentral den henter e proseso aki pa e tambe por benefisiá di e desaroyo ekonómiko aki. Nos ta mira diskushonnan andando kon gobièrnu mester invertí mas den turismo pa konsolidá loke nos tin i pa garantisá kresementu balansá pa futuro, pero nos no ta skucha diskushon relashoná ku invershonnan nesesario den e ser humano ku a lo largu ta esun ku mester karga e industria aki. Nos no ta tende ni skucha diskushonnan relashoná ku invershonnan den otro sektornan ekonómiko ku tin potenshal di krese, pero aun mas importante ta super nesesario pa hasi nos mas outosufisiente posibel i mas ménos dependiente di faktornan eksterno ku nos no tin den nos man. Nos ta un komunidat na inisio di un desaroyo ku por ta briante pa futuro generashon. Laga krea e base sólido promé ku nos bai den e fase di luho di un estado di prosperidat. Boneiru ta leu di ta un komunidat di prosperidat. Na ingles nan lo bisa let’s do first things first.