KRALENDIJK – E resistensia kontra un enorme seru di sushi na Boneiru ta kresiendo despues di un rapòrt resien di Inspekshon Ambiente di Bibienda i Transporte (ILT), kaminda ta papia di “rísikonan di medio ambiente serio”. Habitantenan ta spera ku porfin ta bai hasi algu ku nan preukupashonnan ku nan ta ekspresando pa añanan kaba.

Pasobra e lucha kontra e lèntfel di Selibon na Boneiru no ta nobo. Pa añanan kaba e konsekutivo gobernantenan di e isla tabata primintí pa buska un solushon pa e problemanan rondo di lèntfel, manera ta yama e lugá di tira sushi. Mehorashonnan konkreto a keda afó. Pero awor ku ILT ta bati alarma atrobe pa e situashon preukupante, habitantenan ta èksihí ku di bèrdat gobièrnu ta intervení.

^{Reportahe di radio di Dick Drayer}

Farid Ayubi ta un di e habitantenan ku pa añanan largu ta biba den sombra di e lugá di tira sushi di Selibon. E lèntfel ta e sitio ofisial kaminda ta trese tur sushi di Boneiru. Loke un dia tabata un paraiso, a kambia segun e den un sitio teribel ku a afektá su salú i kalidat di bida serio. 

Ayubi ta lucha ku kehonan di kurason, problemanan ku rosea i afekshonnan neurológiko ku e ta kontribuí direktamente na e polushon. “Dia mi a bin biba akinan, e tabata un paraiso ainda. Mi por a mira laman i kana banda di e laguna, e bénewater i atmirá e flamingonan,” e ta bisa. Awor e bentananan di su kas ta di plak será ku karton i a sera kada buraku chik’i ku silicon, pa tene e gasnan venenoso afó.

 ‘Tur kos ta muri’

E problemanan di salú di Ayubi ta diverso i serio. E ta deskribí kon el a pèrdè rosea despues di un atake di kurason i awor tin molèster diariamente ku hala rosea. “Mi ta kansa hopi i e kalor ta hasi’é pió. E èrko ta drei aki 24 ora pa dia. Tres èrko, pasobra sin e aire friu i limpi nos no por biba.”

E konsekuensianan di e polushon ta bai mas leu ku solamente Ayubi su propio salú. E  ta afektá su bestianan tambe. “Nos tabatin dos kachó ku a muri riba e mésun dia, djis despues ku mi mes a haña un atake di kurason. Tur kaminda bo ta mira bestia morto: para, yuana, pushi. Tur kos ta muri i esei ta afektá mi hopi.”

Su bisiñanan tin eksperensianan similar: nan tambe ta haña hopi biaha bestia morto den nan kurá i nan ta lucha ku kehonan di salú. Spesialmente muchanan den bario ta vulnerable pa e polushon den aire, ku ta kondusí na problemanan ku halamentu di rosea i iritashon di kueru.

E rapòrt di inspekshon di ILT ta suprayá e preukupashonnan di e habitantenan rondó di Selibon-lèntfel: por papia di rísikonan di medio ambiente serio, manera polushon di aire, awa di suela i asta laman. For di mart 2024 tabatin diferente kandela na e lèntfel, i ku ta kimando ainda poko poko bou di tera i ta kousando molester kontinuamente.

Farid Ayubi ta deskribí kon el a pèrdè muebelnan pa motibu di e kandela i e holó stinki ku ta kompañ’é. “Tur mi muebelnan, tur loke ku tabata di paña, a apsorbá e holó di e kandela. Mi no por a keda ku nan, pasobra e holó ei no ta sali nunka mas.”

Gobernante  Nina den Heyer a duna di konosé den un reakshon ku e preukupashonnan di e habitantenan ta na su lugá i ku awor kolegio ehekutivo ta bai tuma akshon. E ta enfatisá ku e situashon no ta nobo, pero ta bisa ku awor ku e rapòrt di ILT si tin un motibu konkreto pa sigui atendé.

Sinembargo e mensahe aki ta zona konosí den orea di hopi habitante. “Kon konfiabel esaki ta ainda?” Ayubi ta puntra su mes. Gobièrnu a primintí asina hopi biaha ku algu lo kambia, pero nada no ta sosodé.”

Ayubi i e otro habitantenan ta bon kla: nan ke pa e lèntfel kumpli ku tur regla di medio ambiente i ku porfin gobièrnu ta asumí su responsabilidat. Ayubi: “Ta basta. E polushon aki no por sigui mas largu, e ta menasá nos salú i di nos yunan”.

Sinembargo awor e tin mas speransa ku nunka. “E habitantenan di den e bario ta forma huntu un komunidat uní, ku ta desidido pa fòrsa porfin kambio. Nos tin sosten di ILT i nos tin awor mas hende ku ta lucha huntu ku nos, warriors nobo a afiliá serka nos.”

“Tin un energia nobo i e atenshon ku nos ta haña porfin di e instansianan ta dunami e sintimentu ku e biaha aki por hasi e diferensia.”