KRALENDIJK–31 di òktober tabata un dia ku sentimentu miksto pa hopi hende. Último dia di trabou pa yefrou Lilian Paula, awor a bai pa penshun. Hóbennan di e skol a despedí di dje parti mainta na e skol i trai mèrdia huntu ku un grupo di persona.  

Yefrou Lilian a bisa na e okashon: “ Mi ta hopi kontentu ku boso ta aki. Nos a traha huntu semper den dushi ambiente, un ta yuda otro. Sigui asina. Sigui hasi esfuerso pa yuda nos hóbennan den nan estudio. Mi ta gradisí tambe mi esposo, pa e pasenshi tur e añanan di mi trabou. Na boso tur masha danki i nos ta sigui mira otro riba kaya. Boso a hasi hopi p’ami.”

Spich

Direktor di Lisen Boneriano, Barbara Sol a tene un spich bunita kaminda a repasá e eksperensia di yefrouw Paula, ku durante su karera den eseñansa na Boneiru a hasi hopi kos. Sol a bisa tombe ku e komunidat di skol lo bai sinti un falta fuerte di yefrou Paula ku tabata un kolega hopi apresiá.