KRALENDIJK – Despues di un trayekto intensivo, diesun aspirante pa ‘bevelvoerder’ di Kuerpo di Bombero Hulanda Karibense (BKCN) a pasa nan eksámen ku éksito. Awor, e bomberonan di Boneiru, Sint Eustatius i Saba ta kla pa aktua komo ‘bevelvoerder’ i duna guia durante situashon di emergensia i insidente.

Un ‘bevelvoerder’ ta kordiná e tim di bombero durante insidente, i ta tuma desishon rápido i efektivo. E ròl aki ta eksigí abilidat di liderazgo fuerte i un bon kapasidat pa evaluá.

E estudio, ku a start na mart 2024, a inkluí tantu konosementu teorétiko komo ehersisionan práktiko. E partisipantenan a fortalesé nan kapasidat di liderazgo i pa tuma desishon i a sigui treinen intensivo. Esaki a inkluí dos siman na Hulanda i Alemania, bou di guia di tantu tres instruktor propio komo instruktornan internashonal.

Ku e generashon nobo di “bevelvoerder´ aki, BKCN ta mihó ekipá pa reakshoná adekuadamente riba diferente tipo di insidente , variando di kombatimentu di kandela te na situashon di emergensia kompleho. Esaki ta fortalesé seguridat di e habitantenan di Boneiru, Sint Eustatius i Saba, i ta oumentá e nivel di preparashon di e kuerpo.

Profeshonalisá

BKCN ta ekspresá su gratitut na tur partner enbolbí, inkluso instansianan di gobièrnu i empresanan lokal, pa nan apoyo durante e estudio. E kolaborashon aki ta yuda e kuerpo pa sigui profeshonalisá i garantisá seguridat na Boneiru, Sint Eustatius i Saba.