KRALENDIJK – Fundashon Ambulans Deseo Boneiru tin e onor pa anunsiá ku Franklin Dominico (‘Bòi’) Antoin ta bai forma parti di nos fundashon komo embahador. Bòi Antoin, ku pa mas ku un dèkada ta demostrá su amor i dedikashon pa Boneiru dor di su trabou pa kultura, historia, protekshon di naturalesa i medio ambiente, awor ta bai kontribuí na e trabou di Fundashon Ambulans Deseo Boneiru.

Den su ròl komo embahador, e lo represetá nos fundashon, duna nos sosten, i bai dediká su mes pa yega na mas hende ku e mision i trabou di e fundashon. Dor di e kompromiso ku Bòi tin ku hende den nan último fase di bida, ku e ta demostrá pa hopi tempu komo un huespet na Hospice Kas Flamboyan, ta hasi Bòi e embahador ideal pa Fundashon Ambulans Deseo Boneiru. Na e hospice, e a tene hopi kombersashon balioso i a hasi intervistanan impaktante ku esnan ku ta residí einan. Ku su atenshon spesial i personal pa nan, i su konekshon profundu ku komunidat, e ta enkarná e atenshon i kompasshon ku nos fundashon tambe ta defendé.

Aparte di su ròl nobo komo embahador, nos ta orguyoso pa anunsiá ku e ber ku nos ta duna kada pashènt despues ku nos kumpli su deséo lo yama “Bòi.” E gesto spesial aki ta inspirá pa e laso estrécho ku Bòi tin ku komunidat di Boneiru i su dedikashon pa hende den situashonnan difísil.

Di duna nos ber un nòmber, nos ta sigui e tradishon di nos organisashonnan ruman. Na Hulanda e ber yama Mario, na memoria di e promé pashènt ku a hasi su deséo ku Stichting Ambulance Wens Nederland; na Kòrsou e ber yama Kees, nombrá pa Kees Veldboer, fundador di Stichting Ambulance Wens; i na Aruba despues di un konkurso pa mnombra e ber a yega na e nòmber Osito. Nos ta kontentu ku Bòi Antoin ta uni su mes ku nos, i ku nos por trahahuntu pa kumpli ku deseonan spesial di esnan ku ta inmóbil i esnan ku ta den fase tèrminal na Boneiru. Ku yudansa di Bòi i su esosten, nos ta spera di por amplia nos mishon i realizá mas deseo bunita.