KRALENDIJK – Un bon ora di yobida algu fuerte djasabra mainta a bolbe mustra ku Boneiru tin un problema basta serio pa loke ta trata drenahe.  

Ounke por bisa ku tabata tin un yobida basta fuerta pa algun ratu, tòg ainda no por kompará esaki ku ora un tormenta tropikal, pa no papia di un orkan, mester pasa riba e isla. Echo ta ku e isla ta keda hopi lihe bou di awa. 

E situashon den añanan tras di lomba a parse di bira pió pa motibu di hopi aktividat di konstrukshon, kaminda ku ta elevá diferente terene ku greis, promé ku kuminsá konstruí. Esaki ta pone ku na hopi kaminda, e awa no por bai niun otro direkshon ku no ta e kamindanan. I ora e akumulá riba kaminda mes, no tin kaminda pa e awa kore bai den mondi manera tabata e kaso antes. 

Un kaminda ku a bira mas problematiko ta por ehèmpel Kaya Gobernador Debrot. Ora ku awa ta yobe por nota kon abou e kaminda aki ta, a pesar ku a pone un kapa nobo di asfalt nobo riba dje apenas algun mas ku un aña pasá.  

Buraku

Otro problema ta ku asina un kaya keda bou di awa, esaki ta kousa ku esaki ta deteriorá hopi lihé, kousando buraku nobo.