Awe e tópiko ta SELIBON. E motibu pa esaki ta ku sindikalismo kier kompartí ku komunidat ku na momento ku AFBW a tuma representashon di trahadónan di Selibon over na 2019 nos punto di lanse banda di mehorá e kondishonnan primario laboral tabata pone preshon pa drecha e sirkumstanshanan bou di kua e trahadónan di Selibon a bin ta traha sin ku ningun órgano di e kompania tabata preokupá nan kabes pa esaki. I ora nos ta papia di órganonan nos ta papia di ariba te abou, esta Konseho Insular komo representantenan di pueblo, Bestuurscollege komo úniko akshonista den Bonaire Holding Maatschappij,  Bonaire Holding Maatschappij mes komo úniko akshonista  di Selibon N.V. Hunta di Komisario di Selibon ku tabatin e tarea di supervisá e maneho di Selibon i komo último gerensia di Selibon ku su tim di maneho ku tabatin e maneho diario di e kompania.

Despues di a regla e kondishonnan primario laboral den un CAO nobo kaminda a logra respetá, rekonosé i finalmente rekompensá e trahadó den un forma hustu a bai pa e sirkumstansianan inhumano bou di kua e trahadónan 8 ora pa dia i esnan di lèntfel 7 dia pa siman mester a laborá. Sirkumstanshanan manera komportashon inakseptabel den e relashon di hefe di departamentunan i e trahadó ku a resultá den un investigashon di kua pronto e resultadonan lo ta konosi. Tur esaki pa falta di un departamentu di Rekurso Humano adekuá. Banda di esaki a konstatá un garashi antikuá insigur ku no por brinda un plan di mantenshon strukturá pa tene e trùknan den sirkulashon ku tur e konsekuensianan ku esaki a trese kuné. Un maneho finansiero ku no a krea reservanan pa por a re-invertí den ekipo i material adekuá despues di mas ku 20 aña.

Un kantina pa personal ku na nos pareser no ta respondé na e eksigensianan modèrno. I finalmente un lèntfel ku riesgonan grandi pa salú di e trahadónan i ku awor a resultá ku riesgonan grandi pa e medio-ambiente den e aria, esta pa vegetashon i bida di animalnan, pero aun mas preokupante riesgo i  menasa grandi pa salú di e habitantenan den e besindario en partikular pero pa poblashon di Boneiru en general. Tur e puntonan aki a keda dokumentá i ilustrá ku potrèt i entregá na e órganonan konserní, pero tur a bira lomba pa e problema i tin hasta a deklará ku Selibon i su problemanan no tin prioridat i ku e tema ei ta pará te abou riba nan lista di prioridat. Awor na 2023 i 2024 “shonnan di Ulanda” a bin abou, inspekshoná, investigá raportá i a konkluí eksaktamente loke nos komo lokal a señalá den un forma dokumentá. Awor tur hende ta na kareda i ta kla pa saka e dede mustra riba e otronan, sin realisá ku e kuater dedenan sobrá ta mustra riba kada un di nan ku no a karga nan responsabilidat den henter e asuntu aki. Tin un menasa den Lèntfel ku sindikalismo a señalá i ku nos no ta mira ku a hasi menshon di dje den e rapòrt, esta no ta atmití ni desmentí i esei ta posibel presensia di rayonan radio-aktivo derá den suela di lèntfel. Sindikalismo ta sostené 100% e lucha di Komishon Pro Lagun pa un Boneiru sigur i salú i ta hasi un yamada serio i urgente na esnan responsabel pa deklará e situashon uno di kalamidat pa asina por trese ayudo den forma di ekipo, hende i fondo pa riba término mas kòrtiku posibel kuminsá ku e solushon struktural di e problema, grandi i kompleho manera e rapòrt a denominé.

Awor ta e ora pa demonstrá ku nos ta goberná pa realmente sirbi interes di nos pueblo. Meskos ku a deklará situashon di emergensia den tempu di Covid ku tabata un énemigu” pafó di Boneiru ku tabata menasá nos, awor nos tin un enemigu paden di Boneiru ku por sierto nos mes a krea. No balotá e situashon i kòrda ku semper por pone kada un di boso personalmente responsabel pa dañonan kisas irreparabel na salú di hende. Negligensha di boso tarea i responsabilidat i akusashon di “otronan” pa e situashon apsolutamente den bista di sindikalismo no ta un opshon. Sindikalismo manera semper ta dispuesto i habrí pa yuda buska solushon i solushon duradero. Nos no ta bai pèrmití pa sigui eksponé e trahadó su salú mas na e riesgo i peliger di un lèntfel mal manehá.