Nos ta aserkando fin di 2024 i ta bon pa sindikalismo tira un bista bèk riba e aña ku ta transkuriendo. Pa loke ta trahadónan organisá den sindikato nos por bisa ku aña 2024 tabata un aña positivo. A logra drecha e forsa di kompra di e klase trahadó ku diferente medida, entre kual oumento di e sueldo mínimo ku opviamente tabatin efekto positivo pa loke ta plaka di fakashon i e bonus di pasku ku tambe a oumentá ku e subida aki.

No mester lubidá ku e oumento di bo entrada pa ora aki tambe a afektá positivamente bo pagonan di overtaim i kaminda trahadónan ta traha warda e pago di oranan irregular den anochi. E kompanianan kaminda trahadónan ta afiliá na un fondo di penshun tambe e oumento aki tabatin un efekto positivo. Diferente kompania a entrodusí un fondo di vitalidat kaminda e trahadó por hasi uso di e fondo aki den un forma ku e ta konsiderá kunbiniente. Diferente kompania a realisá ku mester invertí den desaroyo di nan personal i sindikalismo a logra na diferente kompania pa entrodusí un fondo di formashon pa e trahadó.

Tambe ta bon pa menshoná ku a traha riba mehorashon di e sirkumstansianan bou di kua trahadónan mester traha i aki tambe nos por konstatá ku tabatin avansenan supstanshal. Mas ku tur kos mester menshoná tambe ku sindikalismo a fortifiká su posishon komo bos di e klase trahadó i a gana e rèspèt i rekonosimentu tantu serka sektor gubernamental na Boneiru i na Ulanda i tambe serka nos partnernan di e sektor empresarial. Den un palabra nos a logra trese un balansa sosial hustu den nos komunidat. Lástima ta si ku ainda tin sektornan potenshal riba nos merkado laboral ku no ta organisá i ku nos mester konstatá ku den e sektornan aki tin eksplotashon, abuso, falta di kumplimentu ku nos leinan ta tuma lugá i ku a krea un espiritu di miedu bou di e trahadónan ku no ta akseptabel den e tempu aki. Trahadónan den sektor di horeca, den sektor di konstrukshon, den sektor di seguridat, den sektor di akohida despues di skol i na krèshnan, sektor di supemerkadonan i den sektor di komersio por detal, manera pakusnan ainda no por vense e spiritu di miedu i bula e sombra di kobardia i organisá nan mes den un sindikato eksistente òf lanta nan propio organisashon sindikal. Pero si nos mester pone e totalidat den balansa, sindikalismo por ta satisfecho ku ta serando un aña 2024 positivo.

Den  e mesun rosea aki, nos mester alertá ku aña 2025 ta bai tin su retonan i ku ta eksigí ku e klase trahadó mas ku nunka mester uni forsa pa enfrentá e menasanan ku ta na kaminda. Menasanan ku por afektá negativamente tur e logronan ku a optené den e delaster añanan tras di lomba. I pa kontraarestá e menasanan aki i pa enfrentá e retonan aki, sindikalismo ta di opinion ku nos desaroyo ekonómiko ku enfoke riba outosufisiensia  mester ta e tema di diálogo pa nos yega na desishonnan pa ku akshonnan konkreto pa alkansá un kresementu ekonómiko sostenibel i duradero pa por karga esnan mas vulnerabel den nos komunidat i hiba un maneho sosial hustu. Gobièrnu, sektor Empresarial i Sindikalismo mas ku nunka mester ta na mesa di diálogo pa meskos ku a krea e Akuerdo di Kralendijk pa loke ta trata e aspekto sosial di nos komunidat, mester traha awor pa bin ku un Akuerdo Ekonómiko pa hasi Boneiru muchu mas outónomo ekonómikamente. Pa logra esaki, ekspertonan ta rekomendá

• Desaroyá “Blue Economy” komo e mihó strategia pa engrandesé nos kapasidat pa alkansá prosperidat.
• Desaroyá propio produkshon di kuminda ku invershonnan di gobièrnu i maneho koherente.
• Desaroyá maneho koherente ku e mira pa dominá gastunan di bida i gastunan di hasi negoshi
• Regulá e kresementu di nos poblashon.

I a yega ora pa stòp di papia, stòp di plania, stòp di hunga sabí i ban kuminsá ehekutá, Nos mester kuminsá un kaminda pa nos yega. Goberná pa sirbi.