KRALENDIJK – Diputado Clark Abraham tambe a kompartí su preukupashonnan tokante e krítika di representante di reino interino Jan Helmond pa loke ta trata e aparato di aplikashon na Boneiru. Siman pasá Helmond a kulpa e departamentu di aplikashon pa negligensia di tarea. Segun Abraham esei ta na su lugá, pero esaki ta debí tambe pasobra gobièrnu di reino no a tuma su responsabilidat den pasado pa duna Boneiru mas instrumentonan hurídiko.

Representante di reino interino Jan Helmond a indiká den su deklarashon dikon gobièrnu di reino a intervení den e krísis di sushi na Boneiru, krítika riba e aparato di aplikashon na Boneiru.  “Mi ta kere sigur ku algu no ta bayendo bon i mi por ta hopi sinsero riba esei,” segun Abraham tokante e maneho di aplikashon na Boneiru. E ta splika ku aplikashon tin un prioridat haltu dentro di e maneho di e kolegio aktual. “No ta pòrnada ku nos a pone aplikashon tambe haltu riba nos lista i ku nos ta bai apliká mas invershon den supervishon i aplikashon.” Pa drecha e situashon e kolegio a asigná un kuart mion èkstra na supervishon i aplikashon den e di dos modifikashon di presupuesto.

Gobièrnu di Reino no ta tuma responsabilidat 

Un opstákulo grandi den e aplikashon aktual na Boneiru segun Abraham ta e uso limitá di e lei general di derecho atministrativo na Boneiru. “E lei ei no ta aplikabel pa Boneiru”, e ta bisa. Falta di e instrumentonan hurídiko aki ta hasi mas difísil pa aktua efektivo. Kolegio ehekutivo lo a indiká esaki na un okashon anterior kaba na Reino. P’esei Abraham ta insistí un biaha mas serka Gobièrnu di Reino pa tuma nan responsabilidat i deklará ku e lei ta aplikabel na Boneiru. “Nos ta insistí urgentemente serka Gobièrnu di Reino pa tuma nan responsabilidat i deklará e lei general di derecho atministrativo aplikabel,” segun Abraham.