KRALENDIJK – Curoil, e úniko suministradó di bòternan di gas na Boneiru, ta risibí krítika fuerte di partido polítiko M21, pa loke ta deskibí komo un polítika inkorekto i rígido di e kompania.

E partido ta referí na e echo ku klientenan ku no ta registrá den e sistema nobo di Curoil, no por kumpra bòternan di gas yen, ounke sea ku nan a paga depósito den pasado i tin bòternan di gas bashí di Curoil. Segun M21, e problema a surgi ku e introdukshon di un sistema di registrashon nobo na e suministradó, kaminda no tur klientenan eksistente i adrès a keda transferí korektamente.

Segun M21, ta pasa ku Curoil ta ninga pa tuma bòternan bashi òf pa bende un yen, pasobra konsumidó no por prueba ku nan a paga e deposito nesesario den pasado. E partido ta indiká korektamente, ku Curoil semper tabata tin e monopolio pa benta di  bòternan di gas, i ku pesei ta imposibel ku un bòter lo no ta di Curoil mes. “Debí na e posishon di monopolio di Curoil e konsumidó no tin otro opshon tampoko.Awor t’asina ku e hendenan aki tin nan bòternan ku nan a yega di paga depósito pa nan kaba, pero nan no ta registrá den e sistema nobo di Curoil. Konsekuentemente nan no por bestèl bòter nobo i yen serka Curoil.”, segun M21.

Solushon 

M21 ta di opinion ku ta e suministradó ku mester solushoná e problema ku a surgi i ku no ta aseptabel ku konsumidó ta viktima di imperfekshonnan den nan sistema. “E echo ta ku Curoil a kousa e problema aki ora nan a introdukí un sistema nobo i ku awor ta tempu pa resolvé e diskrepansia aki.”