KRALENDIJK – Den un karta pa Staten-Generaal, Kolehio Ehekutivo di Boneiru ta reakshoná positívamente riba sosten amplio den Tweede Kamer pa e plan di impuesto pa islanan BES 2025, pero ta pidi atenshon pa un kuestion urgente: e kordinashon di e suma liber di impuesto liber, i e salario mínimo na 2025.

Ounke e kantidatnan aki tabata ya kordiná na 2024, e tin un peliger ku esaki lo no bai bon na 2025. Esaki por resultá den un situashon kaminda siudano ku entrada  mínimo lo tin ku bai paga algun  dòler pa luna na impuesto, un efekto no-deseabel, tumando na kuenta gastu haltu di bida na Boneiru.

Koleho Ehekutivo pa e motibu ei ta hasi un apelashon riba ministerio di Finansa i Asuntunan Sosial pa logra un solushon prátiko i rápodo dentro di e espasio di polítika eksistente, pa asina e grupo vulnerabel aki lo no sufri konsekuensia negativo. Den e kaso aki por papia di un montante di entre  5 i 11 dòler pa luna, mientras ku e Belastingdienst Caribisch Nederland den práktika no sa kobra pa montante di impuesto ku ta ménos ku 168 dòler pa aña. Esaki ta tradusí su mes den un ekivalente di 14 dòler pa luna.

Solushon struktural

Ademas, nan ta pidi pa un dialogo tokante medidanan fiskal struktural for di 2026 ku ta mas alineá ku e realidat di e ekonomianan di e islanan. Boneiru ta enfatizá ku nan ta dispuesto pa pensa huntu tokante direkshon di solushon pa e aña fiskal 2025.