Den un komunikado ku nan a saka partido polítiko M21 ta denunsiá korektamente e komportashon di e suministradó di energia Curoil, ku no por deskribí otro komo ònbeskòp.

E suministradó di entre otro bòternan di gas tabata semper e úniko suministradó riba e isla. Ta p’esei e ta tantu inkorekto, komo inakseptabel ku nan ta nenga di tuma bòternan di gas bieu bèk, na momento ku konsumidónan no por mustra ku nan a yega di paga un depósito pa esei un tempu.

E ta kompletamente apsurdo pa eksihí di konsumidónan ku nan tin ainda un prueba di un depósito ku nan a yega di paga 20, 30 òf 40 aña pasá. Ta sosodé hopi biaha den práktika tambe ku hürdonan di kas ta pasa bòternan di gas pa otro, òf ku ta hür òf kumpra un kas inkluso e bòternan di gas.

Curoil ta probechá sin bergwensa di e situashon aki. Pa e mésun bòternan di gas e empresa ta risibí tin biaha un depósito na mas ku un okashon, ku despues nan ta hinka den nan propio saku komo ganashi. Banda di esei nan ta nenga di paga depósitonan bèk pa bòternan ku a entregá, apesar di e echo ku ta nan so por a entregá esakinan.

E komportashon di Curoil ta típiko pa monopolistanan. Maske e konsumidó tin rason òf e aktitut di e monopolista no ta hustifiká: Simplemente no tin alternativa. Esun ku ke kushiná, mester paga – rason òf nò.

E situashon ku a surgi no por atribuí esei na Curoil so, pero igualmente na un gobièrnu ku semper a sinta wak sin tuma akshon. Tabata deber di e respektivo gobièrnunan pa mustra Curoil ku su aktitut no ta hustu i ku lo no a tolerá esei tampoko. 

Esun ku tin monopolio ta dikta e reglanan – i esun ku ta para wak ta kompartí e falta.