KRALENDIJK – For di djaluna, 18 di novèmber 2024, e studiantenan di Kolegio San Luis Bertran a risibí un snèk saludabel pa durashon dos siman komo parti di e programa nobo di ‘Kuminda di Skol Saludabel’ di Entidat Públiko Boneiru (OLB). Meta di e programa aki ta pa duna tur mucha na Boneiru akseso na kuminda saludabel. Esaki no solamente ta kontribuí na nan salú i bienestar, pero tambe ta sostené nan den siñamentu.

Kuminda Eskolar Saludabel ta un inisiativa den kuadro di e programa mas amplio “Werken aan Welvaart en Welzijn”, den kua OLB ta boga pa un Boneiru prometedor pa un i tur. Bou di liderazgo di salubridat públiko, e proyekto ta enfoká riba oportunidatnan igual pa muchanan, pa asina nan por partisipá optimalmente den sosiedat.

Inisio di proyekto  na Kolegio San Luis Bertran

E Inisio di proyekto  a tuma lugá na Kolegio San Luis Bertran. Durante un periodo di dos siman, e impakto di e snèknan lo wòrdu analisá kuidadosamente i lo hasi kualke ahuste ku por ta nesesario. E evaluashon aki ta forma un base importante pa kontinuashon di e proyekto na 2025.

Paso pa un futuro saludabel

Ku e proyekto inisial aki OLB ta investigando kon por ofresé kuminda saludabel na skol strukturalmente na Boneiru. E resultadonan di e evaluashon aki lo wòrdu inkluí den trahamentu di plannan pa 2025.