E edishon aki ta dediká na e sindikatonan ku a keda firme i kere den UNION di e klase trahadó na Boneiru. Pero e ta alabes un yamada di solidaridat na esnan ku ainda no ta realisá ku e kousa laboral, e kousa di e trahadó i su famia ta surpasá den tur sentido e kousa personal i/o e kousa di e sindikato individual. Hamas por sirbi e kousa laboral den un forma dividí òf mihó bisá pa sirbi realmente e kousa laboral union i solidaridat den sindikalismo ta indispensabel. I pa tur trahadó pero prinsipalmente lidernan sindikal komprondé, awe mi ta kompartí e meta i mishon di e organisashon internashonal di trahadó ku ta International Labor Organisation, ILO, na kual tin sigur 190 pais afiliá bou di kua Ulanda. 

E organisashon Internashonal di Labor ta dediká su mes den promové hustisia sosial i internashonalmente ta rekonosé derechonan humano i ta konstantemente en buska pa alkansá su meta di origen ku ta hustisia social. Hustisia sosial ta esensial pa pas universal i duradero. Ku e intenshon aki tambe a funda Union Sindikal Boneriano den añanan 2012, esta pa krea na Boneiru ku un ambiente di pas laboral. E promé akshon di USIBO tabta kumpli ku e meta di ILO i trese huntu gobièrnu, dunadónan di trabou i representantenan di trahadó den un Plataforma tripartite kual bira Diálogo Sentral. I nos den sindikalismo di Boneiru uní den USIBO por ta orguyoso di a hasi tur esfuerso i ku éksito pa promové hustisia sosial den nos komunidat.

P’esei awe nos por tuma nota ku te den Tweede Kamer pero tambe pafó di politika, esta serka hendenan ku konosementu di e prinsipio di hustisia sosial a uni nan mes ku sindikalismo di Boneiru i ta ekspresando kritikanan fuerte i fundá kontra e desishon di gabinete Schoof sostené pa un mayoria di parlamentarionan den Tweede Kamer pa laga esnan mas vulnerabel den Caribe bolbe kai den pobresa. Ulanda ta faya den kumpli ku e simpel petishon pa protehá esnan ku ta gana sueldo mínimo i esnan ku ta risibí ònderstant. E desishon aki ta afektá e gruponan aki direktamente den nan eksistensia. Antó ta nèt seguridat di eksistensia ta un di e puntonan di lanse di e aktual gabinete. Pues prediká algu pero hasi nèt kontrali. Pa sindikalismo un akto mayó di hipokresia. E desishon aki di Ulanda ta suprayá no solamente e desigualdat grandi entre Ulanda Oropeo i Ulanda Caribense, pero ta mustra ku ta trata habitantenan den Caribe den un forma strukturalmente inhusto. Kòrda ku semper bai nos lema ta I lo keda DIFERENSHÁ SI, PERO DESKRIMINÁ NÒ. Loke ta hasi e situashon aun mas tristu ta ku e sekretario di asuntunan di Reino ta deklará ku tin sèn, pero e ke warda te kuminsamentu di aña 2025 pa presentá kon e ta ta bai kompensá e baimenu atras di forsa di kompra ku kasi 10%, manera NIBUD a kalkulá. E empobresementu aki ta sin konta e inflashon èkstra ku lo por bin ora ku empresanan pa kompensá e oumentonan di e plan di belasten 2025 lo bai na oumentá nan preisnan di produkto i servisio. Nos ta premirá tambe sla duro pa empresanan chikitu i pa un gran parti di e klase media. Ki efekto negativo esaki lo bai tin riba henter nos kalidat di bida aki na Boneiru no ta konosí.

Mirando e desaroyonan aki i mirando tur esfuerso ku sindikalismo a bin ta hasi pa mehorá kondishonnan laboral, e pregunta grandi ta, sindikalismo lo para na banda i laga un gobièrnu ultra derechista masakrá e klase trahadó i trapa e derecho fundamental humano di esnan vulnerabel den nos komunidat, esta e derecho di tin un eksistensia desente? Sindikalismo na Boneiru lo para mira kon tur nan esfuerso pa sera Cao-nan faborabel pa nanmiembronan ta ser kibrá? E aktitut aki di gobièrnu Ulandes ku sosten di 88 parlamentario ultra derechista no ta promové ètòl un pas laboral duradero i sigur no ta kumpli ku e espíritu di artíkulo 20 di nos konstitushon ku Tweede Kamer mes a apriobá i ku ta pone e obligashon riba gobièrnu pa garantisá e eksistensia desente di esnan vulnerabel i un repartishon hustu di e prosperidat. Un momento pues pa sindikalismo di Boneiru uni den solidaridat sinsero i huntu kumpli ku e meta i mishon di ILO. Ban demonstrá ku nos téi pa sirbi e kousa pa hustisia sosial. Kon por gaqrantisá asina aki pas laboral duradero.