Si mi hasi e pregunta;: Kon nos por komprondé polítika di Bonaire mi por konta ku ta bini hopi kontesta. Si mi puntra: Ta nesesario pa nos komprondé polítika di Bonaire e kontesta por ta si òf no.

Pa medio di polítika Bonaire a bira parti di Hulanda komo Entidat Públiko. Bonaire no ta un munisipio a ni maske trese dilanti munisipio spesial. Na Bonaire MPB ke brasa Hulanda, UPB ke ta mas den Hulanda, DP ke tin un asosiashon liber ku Hulanda.

Partidonan ku no tin asiento den Konseho Insular ke tin mas outonomia, restrukturashon di Antia di seis i referèndem pa pueblo bisa kua ta e status preferí. E pensamentu  pa e status nobo tabata: progreso i bienestar. Bonaire lo a bira e pèrla den Reino. Resultado ta otro. Bonaire a bai drumi banda di e gigante Hulanda i a lora kai den su brasa. Bonaire ta isolá den Antia i no a keda nada di e sintimentu komun di ta antiano manera tempu di Antia sea di seis òf sinku ku un parlamentu antiano.

Mas i mas e kontrastenan riba tereno sosial, ekonómiko, edukashonal i di moralidat ta bini dilanti. Mi ta puntra nos polítikonan: Kiko ta e motibu ku no por solushoná e problema di BOPEC i e eks trahadónan, ki ta e argumentonan ku no por; aliviá pobresa, e skarsedat di bibienda pagabel pa pueblo, eliminá e lista ku 1180 petishon pa un tereno i strukturá e kas sosial.

E punto kulminante ta ku e Akuerdo Atministrativo ku a pone Bonaire bou di kuratela ta bira visibel. Esaki ta e variante di Sint Eustatius. Mènedjer di programa a frakasá i Hulanda ta bai disidí i e tres diputadonan ta bira manera señor Franco. E spiritu ku ta dualu ta: Hulanda ta pone banda di gezaghèber un eks polítiko hulandes komo komisario i partidonan den Konseho Insular por kuminsá pensa riba e posibilidat ku Knops ta pone Konseho Insular un banda te 2023. Meskos ku Kabul a kai Kralendijk ta bai kai.