Kralendijk – Gobièrnu di Boneiru, huntu ku TCB i tur otro interesado ku ta enbolbí ku aktividatnan krusero, ta hasiendo preparashon pa kuminsá ku temporada di krusero, despues ku durante 17 luna e industria a stòp kompletamente komo konsekuensia di e aktual pandemia. 

Dia 2 di sèptèmber 2021 Boneiru ta yama su promé barku krusero bon biní bèk na nos isla. E promé barku krusero ku ta yega ta Equinox di Celebrity Cruises. E barku ta sali for di Florida i ta pasa Bahamas, Aruba, Kòrsou i despues e ta bin Boneiru. Segun pronóstiko e kapasidat di kada barku ku ta bishitá Boneiru ta varia entre 20% i 40%, pues pa 2021 nos ta verwagt un reinisio ménos drùk di e temporada krusero.

Pa motibu di e nivelnan di riesgo relashoná ku COVID-19 ta tuma medidanan nobo estrikto pa drenta haf. Un parti di e medidanan akí ta enserá ku outoridat di haf i departamento di Salubridat Públiko ta hasi e ‘inklaring’, i ku tin sierto eksigensianan pa loke ta trata desembarke, inkluso un kontròl di corona di barkunan krusero na momentu di desembarkashon pa tur pasahero i tur miembro di tripulashon. Pasaheronan (di 12 aña bai ariba) ku ta kompletamente bakuná  ta obligá pa mustra un tèst di PCR negativo ku no ta mas bieu ku 24 ora promé ku salida for di e haf kaminda nan a subi barku. Pasaheronan ku no ta (full) bakuná ta obligá pa mustra banda di un tèst di PCR negativo un tèst antigéniko tambe, pa mas tardá 24 ora promé ku yegada na nos isla. Tripulashon i pasaheronan no por desembarká si nan no tene nan mes na e medidanan akí. Pa salbaguardiá siguridat di tur hende, empleadonan di siguridat i personal kualifiká lo kontrolá aktivamente si tur pasahero ku ta bishitá Boneiru ta kumpli ku e eksigensianan akí.

Tur hende na e haf, inkluso habitantenan i turistanan, ta obligá pa bisti un tapaboka i mantené 1,5 meter di distansia sosial riba nos isla tambe. Tur hende ku ta hasi paseo den bùs of den taksi ta obligá pa bisti un tapaboka.

“Nos ta kontentu ku reinisio di turismo krusero; esaki ta nifiká reinisio di mas aktividat ekonómiko na nos isla despues di e pandemia. Nos meta ta pa mantené e industria krusero, pero hasi algun kambio tambe pa anda mas mihó ku ‘crowd management – maneho di multitut’ i pa atraé e tipo di turista ku por gasta mas na nos isla. Un di e kambionan ta pa “one call a day” i krea un mihó ekilibrio entre e kantidat di barkunan krusero durante temporada super haltu i temporada abou. Pa motibu di e akuerdonan aktual esaki por dura algun tempu, pero e barkunan krusero ta habrí pa esaki i nan ta dispuesto pa yuda nos ku e meta akí kaminda esei ta posibel. Banda di stimulá nos ekonomia nos meta ta naturalmente tambe pa protehá salú i siguridat di nos komunidat lokal i e personanan ku ta bishitá nos, esei ta e motibu ku nos a tuma vários medida pa garantisá siguridat di nos tur”, segun Hennyson Thielman, diputado di turismo i desaroyo ekonómiko.

Esaki ta resultado di un evaluashon durante e temporada inaktivo di krusero pa limita e impakto riba e medio ambiente, infrastruktura, tambe pa por tin mas enfoke riba kalidat i no kantidat i  tambe riba e impakto ekonómiko manera ta den e Tourism Recovery Plan.

Durante bishitanan krusero Kaya C.E.B. Hellmund lo ta parsialmente será: for di Luciano’s te na ofisina di duana. Tur hende ku ta traha konforme e normanan operashonal di ‘TCB Cruises’ mester bisti un karnèt, ku kua nan por operá dentro di e fronteranan di nos sentro di suidat durante e temporada krusero.

---

Lesa tambe:

• 
  Partnernan di CAO pa Islanan BES a topa pa deliberá riba desaroyo 
• 
  Prevení Zika, Dengue i Chikungunya
• 
  Organisashonnan Karibe Hulandes ta traha huntu pa preveni violensia kontra hende muhé
• 
  Sindikalismo na Boneiru parti 47, 25 di novèmber 2024
• 
  Curoil ta hasi su mes kulpabel na komportamentu sin rèspèt, pero gobièrnu ta tolerá esei