Kralendijk- E kantidat di kaso aktivo di Covid-19 a krese bai 26, despues ku 6 hende a tèst positivo, i 2 hende a rekuperá.

Un total di 59 hende a pasa tèst, di kual 6 a resultá di ta positivo. Un porsentahe di masomenos 10%.

Aktualmente tin un solo persona interná den hospital pa motibu di Covid. Gobièrnu ta hasiendo un apelashon riba tur hende ku no a bakuná ainda, pa bai hasi esaki. Esaki ta spesialmente rekomendá pa hende ku tin otro malesa ku nan ta sufri di dje, i ku por hasi nan mas bulnerabel pa Covid-19.

Aunke bakunashon no ta evitá por kompletu ku hende wòrdu infektá, e ta kondusí na síntoma ménos severo i hopi biaha hendenan bakuná, si nan pega ku Covid mes, no ta resultá den hospital.