Kralendijk- E kabinete hulandes, pa ta mas eksakto minister Cora van Nieuwenhuizen di Infrastruktura i Maneho di Awa (I&W), tin mas ku dos aña ta birando chanchan riba e asuntu di prèisnan mas pagabel pa buelonan entre e islanan ABC, i entre e islanan di St. Maarten, St. Eustatius i Saba.

Na aña 2018 kaba, e kompania di konsùltent SEO a konstatá ku e merkado di buelo entre e islanan ta un merkado imperfekto i ku tiki moveshon. Esaki, segun SEO, ta kondusi na un situashon instabil i unu ku prèisnan haltu.

Basá riba e konklushonnnan di entre otro SEO, a enkargá un komishon miksto di e islanan i Hulanda, bou di liderazgo di eks direktor di KLM, Peter Hartman, pa bini ku rekomendashon konkreto kon pa yega na mas stabilidat i prèisnan mas abou pa biahamentu entre e islanan.

Supsidio

Hartman ku su tim, ku tabata tin partisipashon di Boneiru tambe aden, den persona di Elvis Tjin Asjoe i gezaghèber Edison Rijna a kompilá un rapòrt ku tabata konsehá pa su supsidiá pasashi pa residente di entre otro Boneiru, St. Eustatius i Saba, o sea e islanan BES.

Aunke ku Hulanda no tin masha gana pa asumí e responsabilidat ei, por konsiderá transporte públiko, entre otro buelo entre e islananan un obligashon di parti di Hulanda, meskos ku ta e kaso por ehèmpel ku e sistema di trèin na Hulanda.

A pesar di e echo ku e rekomendashonan ta hopi konkreto, e minister no a move un dede pa realisá rekomendashonnan di komishon Hartman.

“Van Nieuwenhuizen no tin mashá interes den e islanan Karibense, meskos ku ta e kaso ku hinter VVD”, asina un hende yegá na e materia a splika AworBonaire. E situashon a empeorá na momento ku e direktorado di Aviashon na Hulanda a haña un direktor nobo, i e direktor anterior Rob Huyser a tuma un enkargo na otro ministerio.

Kolegio Ehekutivo

Lastimamente, di parti di Konseho Ehekutivo, ni di parti di Konseho Insular, ultimamente a papiando mashá riba e asunto di prèis di pasashi haltu. Tin mas ku un aña ku no ta tende nada di e materia aki na Boneiru. E no ta parse di ta mashá haltu riba agènda di nos mandatarionan, mientras ku e prèisnan a sigui haltu i esaki lo bira pió.

Asina aeropuerto di Kòrsou ta insití pa hisa ‘airport tax’ kada biaha ku tin un oportunidat pa esaki. E situashon di Covid, ku gastunan adishonal i un situashon finansiero pa e aerolíneanan ku ta ehekutá buelo entre nos islanan, no ta duna espasio pa baha prèis. De hecho, ta subi lo mester subi prèis, pero tin miedo ku esaki lo afektá ainda mas e gana di biaha entre e islanan. Esaki atrobe lo tin un impakto negativo riba e mesun aerolíneanan ku ta bringando pa tene kabes riba awa.