Kralendijk – E echo ku Den Haag ta tarda pa duna lus bèrdè pa un plan di invershon pa e Kompania di Awa i Koriente di Boneiru (WEB Bonaire NV) no solamente  innesesariamente ta kondusí na un tarifa di koriente mas haltu, pero ku tempu por trese suministro di koriente na peliger.

Diputado Hennyson Thielman: ‘For di 2010 poblashon di Boneiru a krese hopi. For di e último sifranan di Ofisina Sentral di Estadístika ta resultá ku den e añanan binidero e kresementu ta kontinuá. Na mes momentu turismo lo sigui desaroyá mas aleu, mientras ku aktividat empresarial tambe ta oumentá. Esaki ta nifiká ku e demanda pa koriente lo oumentá. Pa e motibu akí WEB tin ku hisa su kapasidat di produkshon pa evitá ku aworó mester bai limitá suministro di koriente, pero pa esei WEB tin mester di koperashon di Den Haag sí.’

Na aña 2020 WEB a presentá un plan na ministerio di Asuntunan Ekonómiko i Klima pa hisa e kapasidat di produkshon pa medio di instalashon di molina di bientu nobo i realisashon di un parke solar. ‘Ku e plan akí WEB por sigui kana den ritmo ku e kresementu di poblashon, turismo i aktividat empresarial ku por ferwagt te na aña 2030. I hasi esaki na un manera sostenibel tambe, loke alabes ta kondusí na un tarifa mas abou. Esaki ta pas perfektamente den nos vishon i e ta bon pa nos suidadanonan, nos ekonomia i nos medio ambiente.’

P’esei diputado Thielman ta spera ku riba término korto e ministerio ta tuma un desishon. ‘E márgen den kapasidat di produkshon ta bahando rápidamente, di 15% na aña 2020 pa te ku awor akí solamente 10%. Kada dia ku nan keda sin tuma un desishon, ta hala e momentu ku WEB lo no por kumpli ku e demanda mas, mas aserka. Mi no por imaginá mi mes ku gabinete lo ke laga esaki yega asina leu i mi ta sali for di e punto di bista ku den e periodo binidero nos lo mira un kontribushon konstruktivo for di Den Haag.’

---

Lesa tambe:

• 
  OLB ta kuminsá eksplorá snèk saludabel pa mucha na Kolegio San Luis Bertran
• 
  No tin sufisiente klaridat ainda di ‘promé stapnan’ na lèntfel Boneiru despues di intervenshon di Hulanda
• 
  Tourism Corporation Boneiru satisfecho ku partisipashon na DEMA Diveshow
• 
  Subway Boneiru a habri bèk despues di renobashon
• 
  Prosedura pa mèldu negoshi di hóreka i negoshi di konstrukshon a kuminsá ofisialmente