Kralendijk – Presta atenshon mas kuidadoso na víktimanan, espesialmente víktimanan di delitunan seksual, tabata e tema sentral di e “themadag” organisá djaweps dia 26 di ougùstùs na Kòrsou dor di e Ofisina di Prokurador General di Kòrsou, Sint Maarten i Boneiru, Sint Eustatius i Saba OM Carib pa su partnernan den kadena hudisial den parti karibense di Reino Hulandes.

E “themadag” aki, organisá na Acoya Curaçao, a ser presensiá dor di partisipantenan di kuerponan polisial, Korte, slachtofferhulp i empleadonan di Ministerio Públiko responsabel pa e aserkamentu di delitunan seksual i/òf e kuido di víktimanan.

A skohe e tema aki spesífikamente pa enfoká riba delitunan seksual i pa pone mas énfasis riba e situashon i duna mas atenshon na e víktimanan di e tipo di delitunan aki. Derecho penal ta indiká kompletamente kon pa trata ku e sospechoso- i outornan, sin embargo, e víktima mester haña un konsiderashon mas kuidadoso, spesialmente den kasonan di agreshon seksual. Delitunan seksual ta konstituí violashonnan grave di e integridat físiko i mental, i tambe di e dignidat di e víktima.

Delitunan seksual ta grave, mirando e impakto ku nan tin pa ku e personanan impliká, nan entorno i komunidat den su totalidat. Pa e rason aki ta di sumo importansia pa profeshonalnan riba e tereno aki ta prepará pa atendé ku víktimanan.

Varios eksperto riba e tereno di e aserkamentu di delitunan seksual a duna presentashonnan na e 40 partisipantenan. “Trouma i violensia i victim blaming” a ser tratá dor di Dr. Iva Bicanic, Kordinadó di e Sentro Nashonal pa Violensia Seksual di Hulanda, i “Aserkamentu di víktimanan” dor di Yet van Mastrigt, eksperto den kasonan kontra di moral di Polis Nashonal. E tópiko “Skucha menor” a keda presentá dor di e sikólogo hurídiko i di investigashon, Jannie van der Sleen, asina tambe “Evaluashon di deklarashonan pa ku delitunan seksual”. Señor Guillano Schoop, fiskal di Kòrsou, a trata e tema “Grooming”.

Promé Minister di Kòrsou i ademas Minister di Hustisia interino, Gilmar Pisas, a inougurá e “themadag”. For di 2018, Ministerio di Hustisia di Kòrsou ta trahando riba e optimalisashon di e aserkamentu di e kasonan di agreshon seksual. Un pilar di esaki ta e fortalesemenu di e perisia di e personal responsabel pa e aserkamentu di delitunan seksual. Promé Minister Pisas, den su papel di Minister di Hustisia, ta apoyá e enfoke aki.

Den konteksto di e Plan Nashonal di Kòrsou pa kombatí violensia kontra di mucha i violensia doméstiko/relashonal, e Minister di Desaroyo Sosial, Labor i Bienestar (SOAW), Ruthmilda Larmonie[1]Cecilia, tambe a kontribuí na e “themadag”, mirando ku e ta konsiderá e dia aki adekuá pa ku e ophetivo di reforsá e perisia spesialisá na diferente nivel i aspekto.

Asina e “themadag” por a konta ku e apoyo firme di e Ministerio di Hustisia i di SOAW di Kòrsou i tambe di e Ministerio di Hustisia di Hulanda.

Pa klousurá e dia, Prokurador General OM Carib, Ton Maan, a animá e partisipantenan presente pa apliká e konosementu ku nan a atkirí den nan proseduranan di trabou. E ophetivo final di e “themadag” ta pa proboká mihó kuido i atenshon pa ku e víktimanan di agreshon seksual i pa e mesun víktimanan aki manifestá nan mes komo sobrebibiente, pa nan mes bienestar i esun di komunidat.

E komité organisadó di e “themadag” ta konsistí di e ekipo di OM CARIB i e hefe di e ekipo di kasonan kontra di moral di polis di Sint Maarten, Dientje John-Muller.

---

Lesa tambe:

• 
  OLB ta kuminsá eksplorá snèk saludabel pa mucha na Kolegio San Luis Bertran
• 
  No tin sufisiente klaridat ainda di ‘promé stapnan’ na lèntfel Boneiru despues di intervenshon di Hulanda
• 
  Tourism Corporation Boneiru satisfecho ku partisipashon na DEMA Diveshow
• 
  Subway Boneiru a habri bèk despues di renobashon
• 
  Prosedura pa mèldu negoshi di hóreka i negoshi di konstrukshon a kuminsá ofisialmente