Kralendijk – Erica Chirino i Rosalinda Semper Antoin, dos boluntario aktivo di Fundashon ‘Prinses Wilhelmina Fonds’, dia 1 di sèptèmber den oranan di mainta a bishitá gezaghèber Edison Rijna, pa asina gezaghèber por a hasi e promé donashon pa di e manera ei inisiá ofisialmente ku luna di sèptèmber ku ta e luna di kolekshon pa fundashon ‘Prinses Wilhelmina Fonds’.

Gezaghèber Rijna ta haña importante si tur hende por koperá pa asina por yuda kombatí e malesa kanser. Despues di a hasi su donashon gezaghèber a deseá e fundashon éksito i tambe a ekspresá e speransa ku pa hopi tempu mas nan lo sigui ku e bon trabou ku nan ta hasiendo pa Fundashon ‘Prinses Wilhelmina Fonds’.

Meskos ku aña pasá e fundashon ta hasi un yamada pa hasi tur donashon via online banking of pa hasi uso di nan mashin di swaip, pa asina tur hende por tene nan mes na e reglanan di Covid-19.