Kralendijk- Durante luna di sèptèmber Boneiru ta selebrá luna di Turismo. Nos komunidat ta representá e esensiá di Boneiru su turismo, i pa e motibu aki nos turistanan lo keda yamá bon biní dor di zonido di músika i ritmo tradishonal.  Un kantidat di evento lo wòrdu organisá den luna di sèptèmber ku un enfoke riba komparti nos sekretonan lokal di nos hendenan i kultura.

Riba 4 di sèptèmber Tourism Corporation Bonaire (TCB) a organisá su promé eksperensia na Flamingo International Airport kaminda pasaheronan ku a yega a haña un bon biní ku músika di Ka’i òrgel. Adishonalmente bishitantenan tabatin oportunidat pa eksperensiá i saka potrèt ku nos bonerianonan bistí na trahe folklóriko. Tur bishitante a risibí un regalo komo parti di apresio di nan bishita nos isla.

Meta

TCB su meta ta pa kontinuá komparti nos sekretonan lokal i inspirá nos bishitantenan pa siña konosé nos kultura, herensia i manera di biba. TCB ta kontentu di por yama nos bishitantenan bon biní durante luna di sèptèmber, selebrando nan yegada i ku nan por eksperensiá Boneiru su outentisidat. Tur pasahero yegando riba djasabra entre 1 ‘or di merdia pa 5 ‘or di atardi lo risibí un kaluroso bon biní.