KRALENDIJK – Boneiru a sorprendé su partnernan turístiko na Hulanda ku un evento di Taste of Bonaire, Edishon Cocktail, den Mondi Caribbean Cuisine Restaurant na Amsterdam, organisá pa Miles Mercera, CEO di Tourism Corporation Bonaire (TCB). E lokalidat karibense íntimo akí a brinda oportunidat pa nos partnernan pasa un anochi agradabel i edukativo.

E anochi a kuminsá ku un tayer di cocktail ku animashon di e talento boneriano Eddy Trenidad, konosí tambe komo Sir Eddy, doño di Tiki & Co Bar na Boneiru. Nos partnernan a keda animá pa durante e tayer krea nan propio cocktail, inspirá pa sabornan boneriano. Despues di a sakudí i hari un par di biaha i un presentashon di Boneiru na enkargo di Miles Mercera, nos wéspetnan i partnernan VIP di medionan di komunikashon na Hulanda konhuntamente a gosa di un sena karibense, prepará pa e chèfkòk karibense Justin Niessen, doño di Mondi Caribbean Cuisine Restaurant. TCB a hasi uso di e oportunidat pa gradisí su partnernan pa e sosten durante aña 2021 i pa ofresé un brindis pa un koperashon mas fuerte ainda pa aña 2022.

TCb ta spera di por sigui organisá evento den futuro pa partnernan riba diferente merkado importante pa por kompartí su vishon, plannan i akshonnan. Ademas pa Boneiru esaki tabata un tremendo oportunidat pa na Hulanda kompartí e ambiente hospitalario ku un tiki solo i vibrashon di nos isla.