KRALENDIJK- Ya por a spera esaki en bista di e kontagionan di Covid-19 na Boneiru ku no ta bahando: Kòrsou a agregá Boneiru na e lista di paisnan di ‘riesgo hopi haltu’.

Ku esaki, biaheronan for di Boneiru ku ta biaha bai Kòrsou, no mester hasi solamente un tèst di PCR, na lugá di un tèst antígeno ku tabata akseptá te awor aki, pero awor biahero mester hasi ámbos un PCR promé ku e dia di biaha, siguí pa un tèst antígeno despues di tres dia ku a yega Kòrsou.

Nivel di kontagio

Mientrastantu e nivel di kontagio nobo ta sigui haltisimo na Boneiru. Ounke ku ayera tabata tin ‘solamente’ 6 kaso nobo mester remarká ku ta 50 hende so a pasa tèst. Esaki ta nifiká ku 12% di e tèstnan a sali positivo. Pa djasabra tin 13 tèst ku a sali positivo riba un total di 87 hende ku a tèst, o sea 15% a sali positivo. Manera por mira, e porsentahe di tèst positivo no ta mustra ni komienso di un tendensia di baha.

Entretantu departamentu di Salubridat Públiko ta manera ‘riba un rùst’ i no ta parse di ta den un estado di alerta. Tur dia ta saka e mesun komunikado pa prensa, skibiendo ku ‘e fuente di e kontagio ta konosí’. No ta sali duna ningun splikashon, ni tampoko análisis ta kiko tin tras di e sifranan haltu aki, i kon ta spera di baha esaki.